2030-yilgacha 50 ming nafar o‘zbekistonlik Nordik davlatlariga ishga yuboriladi
O‘zbekiston 2030-yilgacha 50 ming nafar fuqaroni Shvetsiya, Daniya va Norvegiyaga yuqori daromadli ish o‘rinlariga yuborishni rejalashtirmoqda.
Bu haqda prezident Shavkat Mirziyoyev Tashqi ishlar vazirligi va xorijdagi diplomatik vakolatxonalar faoliyatiga bag‘ishlangan videoselektor yig‘ilishidama’lum qildi.
Yig‘ilishda ta’kidlanishicha, avval o‘zbekistonliklar asosan ikki-uch davlatda mehnat qilgan bo‘lsa, hozirda tashkiliy migratsiya asosida 30 dan ortiq mamlakatda ishlamoqda. Tahlillarga ko‘ra, Shvetsiya, Daniya va Norvegiyada jami 300 ming nafargacha ishchi kuchiga ehtiyoj mavjud.
Xususan, norvegiyalik ish beruvchilar joriy yilda 3 ming nafar o‘zbekistonlikni o‘qitib, Yevropa standartlari asosida sertifikat berish hamda 2,5–3 ming yevro maoshli ish bilan ta’minlashga tayyor ekanini bildirgan. Shvetsiya tomoni esa grant asosida ijtimoiy xodimlarni tayyorlab, 2026-yilning o‘zida 500 nafar mutaxassisni ishga olishni taklif qilmoqda.
Prezident Migratsiya agentligi rahbari Behzod Musayev va O‘zbekistonning Shvetsiyadagi elchisi Rahmatulla Nurimbetovga 1-aprelga qadar Shvetsiya, Daniya va Norvegiya bilan kelishuvlarga erishib, joriy yilda 5 ming, 2027-yilda esa kamida 10 ming nafar fuqaroni yuqori daromadli ish o‘rinlariga yuborish vazifasini topshirdi.
“Umuman, Nordik davlatlar — Shvetsiya, Norvegiya, Daniya, Finlandiya va Islandiya tashqi mehnat migratsiyasida biz uchun yangi yo‘nalish bo‘lib, kamida 500 mln yevrolik mehnat bozorini anglatadi”, — dedi davlat rahbari.
Shuningdek, Behzod Musayev, Rahmatulla Nurimbetov hamda Latviyadagi elchi Timur Rahmonovga bir oy muddatda maxsus dastur ishlab chiqish topshirildi. Ular 2030-yilgacha 50 ming nafar fuqaroni Nordik davlatlariga ishga yuborish bo‘yicha mas’ul etib belgilandi.
Yig‘ilishda ayrim mamlakatlardagi elchilarning o‘zbekistonliklarni tashkiliy tarzda ishga joylashtirish bo‘yicha tashabbus ko‘rsatmayotgani tanqid qilindi. Avstriya, Fransiya, Ispaniya, Italiya, Chexiya va Saudiya Arabistonidagi elchilarning bu boradagi faoliyati qoniqarsiz ekani qayd etildi.
Yangiliklarni baham ko'ring
Sizga yoqadi
