O‘zbekistonda taksi xizmatlari qimmatlamoqda: narxlar bir yilda 12,2 foizga oshdi. Haydovchilarning ham maoshi oshdi
O‘zbekistonda taksi xizmatlari narxi o‘sishda davom etmoqda. Milliy statistika qo‘mitasi ma’lumotlariga ko‘ra, 2025 yil noyabr oyida taksida yo‘l haqi oktabr oyiga nisbatan o‘rtacha 0,5 foizga qimmatlagan.
Yil boshidan buyon taksi narxlari 7 foizga oshgan bo‘lsa, o‘tgan yilning shu davriga nisbatan o‘sish 12,2 foizni tashkil etgan.
Ma’lumot uchun, taksi bozorida daromadlar ham sezilarli darajada o‘sgan. Yandex Uzbekistan ekotizimining strategik rivojlanish bo‘yicha vise-prezidenti Sardor Qodirovga ko’ra, 2025 yilning yanvar–noyabr oylarida Yandex Go ilovasi orqali ishlayotgan haydovchilar va hamkor parklar jami 6,6 trln so‘m (525 mln dollar) daromad olgan.
Bu ko‘rsatkich o‘tgan yilning mos davriga nisbatan 1,8 trln so‘mga yoki 38 foizga ko‘p. Qayd etilishicha, mazkur summa kompaniyaning xizmat haqi ushlab qolinganidan keyingi sof daromad hisoblanadi.
Shu davrda haydovchilarning o‘rtacha soatlik daromadi o‘tgan yilga nisbatan 21 foizga oshgan. Taksi haydovchisining bir oylik o‘rtacha daromadi esa 10,2 mln so‘mni tashkil etgan. Hisob-kitob kuniga 8 soat, oyiga 22 ish kuni asosida amalga oshirilgan.
Sizga yoqadi
