Investitsiyalar uchun yangi davr: davlat ulushi qisqaradimi?
Xalqaro valyuta jamg‘armasi O‘zbekistonda davlat korxonalari sektorini tubdan isloh qilish zarurligini ta’kidlab, foydali korxonalarni xususiylashtirish va zarar ko‘rayotganlarini yopishga chaqirdi.
Jamg‘arma bayonotiga ko‘ra, bu choralar iqtisodiy o‘sishni tezlashtirish, investitsiyalarni oshirish va xususiy sektorni rivojlantirish uchun muhim hisoblanadi. Ayniqsa, raqobat mavjud bo‘lgan sohalarda xususiy kompaniyalar samaradorligi yuqoriligi ko‘plab tadqiqotlar bilan tasdiqlangan.
Shu sababli, rentabelli davlat korxonalarini xususiylashtirish, samarasiz va yashovchan bo‘lmaganlarini esa xodimlarni qo‘llab-quvvatlash choralarini ko‘rgan holda tugatish tavsiya etildi.
Strategik yoki raqobat past bo‘lgan tarmoqlarda esa asosiy e’tibor korporativ boshqaruvni kuchaytirish, davlat aralashuvini kamaytirish va “yumshoq” budjet cheklovlarini bartaraf etishga qaratilishi kerak.
Jamg‘arma bir qator muhim islohotlarni ham sanab o‘tdi:
- davlat mulkchilik siyosatini aniq belgilash
- kuzatuv kengashlari faoliyatini shaffof qilish
- notijorat faoliyatni cheklash
- xususiy sektor ishtirokini kengaytirish
Bundan tashqari, barcha davlat korxonalari uchun xalqaro audit va moliyaviy hisobot standartlarini joriy etish zarurligi ta’kidlandi.
Xalqaro valyuta jamg‘armasi shuningdek, boshqaruv tizimini mustahkamlash uchun axborot beruvchilarni himoya qilish va aktivlarni deklaratsiyalashga oid muhim qonunlarni qabul qilishni tavsiya qildi.
Mehnat bozori islohotlari doirasida ayollar bandligini oshirish, norasmiy sektorni qisqartirish va malakali kadrlar yetishmasligini bartaraf etish zarurligi qayd etildi.
Shuningdek, iqlim o‘zgarishiga qarshi choralarni kuchaytirish, energiya samaradorligini oshirish va davlat investitsiyalarini ekologik maqsadlar bilan uyg‘unlashtirish muhimligi ta’kidlandi.
Jamg‘arma xulosasiga ko‘ra, bozorni tartibga solishni kuchaytirish, eksklyuziv huquqlarni bekor qilish va islohotlarni yakunlash xususiy investitsiyalar oqimini sezilarli oshiradi.