Meta sudda yutqazdi: bolalar xavfsizligi uchun $375 mln jarima
Meta kompaniyasi bolalar xavfsizligi bilan bog‘liq jiddiy sud ishida yirik miqdorda jarimaga tortildi. Nyu-Meksiko shtatidagi hakamlar hay’ati kompaniyani voyaga yetmagan foydalanuvchilar xavfsizligi borasida jamoatchilikni chalg‘itganlikda aybdor deb topdi.
Sud qarorigako‘ra, Meta $375 million miqdorida jarima to‘lashi kerak. Ushbu ish ilk bor 2023-yilda shtat bosh prokurori tomonidan qo‘zg‘atilgan bo‘lib, kompaniya o‘z platformalarining bolalar uchun xavfli jihatlarini bilgan holda yetarli choralar ko‘rmaganlikda ayblangan.
Tergov davomida Meta xizmatlari voyaga yetmaganlarga nomaqbul kontentni ko‘rsatishi hamda ularni potensial xavfli foydalanuvchilar bilan bog‘lab qo‘yishi mumkinligi aniqlangan. Sudda sobiq xodimlar ham kontent moderatsiyasi va tavsiyalar tizimidagi muammolar haqida guvohlik bergan.
Jarima summasi minglab alohida qoidabuzarliklardan shakllangan bo‘lib, har biri $5 minggacha baholangan — bu esa qonunda belgilangan maksimal miqdor hisoblanadi.
Hakamlar hay’ati bu holatni iste’molchilar huquqlarini buzish va insofsiz tadbirkorlik deb baholadi.
Meta esa qarorga rozi emasligini bildirib, apellyatsiya berishini ma’lum qildi. Kompaniya o‘z bayonotida o‘smirlarni himoya qilish uchun maxsus akkauntlar va ota-ona nazorati kabi vositalarga sarmoya kiritishda davom etayotganini ta’kidladi.