O‘zbekistonda 13–19-aprel— qanday ob-havo kutilyapti?
13–19-aprel haftasida O‘zbekistonda ob-havo keskin o‘zgaradi: hafta boshidagi jazirama issiq o‘rnini hafta o‘rtalarida salqin, yomg‘irli va shamolli kunlar egallaydi.
Hafta boshida, dushanba va seshanba kunlari hududlarda quruq va issiq havo saqlanib, harorat +29…+32 darajagacha ko‘tariladi. Ayniqsa, janubiy va cho‘l hududlarida issiqlik ancha seziladi.
Biroq seshanba kechidan boshlab vaziyat o‘zgaradi. Kaspiy tomondan kirib keladigan nam va sovuq havo oqimlari sabab chorshanbadan harorat keskin pasayadi. Kunlik harorat +15…+20 darajagacha tushib ketadi, ayrim joylarda esa bundan ham salqin bo‘lishi mumkin.
Yog‘ingarchilik 14-apreldan shimol va tog‘larda boshlanadi, 15–17-aprel kunlari esa deyarli butun respublika bo‘ylab davom etadi. Ayrim hududlarda yomg‘ir kuchli bo‘lib, momaqaldiroq bilan kechadi. Tog‘li hududlarda jadal yog‘inlar kuzatiladi, 16-aprel kuni baland tog‘larda qor yog‘ishi ham mumkin.
15–16-aprel kunlari shamol ayniqsa kuchayadi. Qoraqalpog‘iston, Xorazm, Buxoro va Navoiy viloyatlarida shamol tezligi soniyasiga 25 metrgacha yetishi mumkin. Cho‘l hududlarida chang bo‘ronlari kuzatilishi ehtimoli bor.
Hafta o‘rtalarida tungi harorat ham pasayib, +5…+8 darajagacha, ayrim joylarda esa +3 darajagacha tushadi.
Keskin ob-havo o‘zgarishlari, ayniqsa, qon bosimi bilan muammosi borlar va ob-havoga sezgir insonlar uchun noqulaylik tug‘dirishi mumkin.