O‘zbekistonda o‘rtacha oylik 7 mln so‘mga yaqinlashdi
Statistika qo‘mitasi ma’lumotlariga ko‘ra, 2026-yilning I choragida O‘zbekistonda o‘rtacha oylik ish haqi 6 mln 820 ming so‘mni tashkil etdi.
Qayd etilishicha, bu ko‘rsatkich o‘tgan yilga nisbatan qariyb 1 mln so‘mga oshgan, ya’ni mamlakatda o‘rtacha ish haqi 7 mln so‘mga yaqinlashgan.
Hududlar kesimida eng yuqori oylik Toshkent shahrida kuzatilib, u yerda o‘rtacha ish haqi 11 mln 700 ming so‘mni tashkil etgan. Eng past ko‘rsatkich esa Qashqadaryo viloyatida qayd etilib, o‘rtacha maosh 4 mln 660 ming so‘m bo‘lgan.
Sohalar bo‘yicha tahlil qilinsa, eng yuqori ish haqi bank va sug‘urta tizimida ishlovchilarga to‘g‘ri keladi — bu yo‘nalishda o‘rtacha maosh 18 mln 600 ming so‘mni tashkil etgan.
Aksincha, eng past daromad qishloq xo‘jaligi sohasida kuzatilgan bo‘lib, bu yerda o‘rtacha oylik 3 mln 500 ming so‘m atrofida qayd etilgan.
Mutaxassislar o‘rtacha ish haqi o‘sishi iqtisodiy faollikning ortayotgani bilan bog‘liq ekanini ta’kidlashmoqda. Shu bilan birga, hududlar va sohalar o‘rtasidagi tafovutlar saqlanib qolmoqda.