O‘zbekistonda o‘zini o‘zi band qilganlar uchun ijtimoiy soliqning minimal miqdori 412 ming so‘mgacha oshirildi
Yangi o‘zgartirishlar, shuningdek, litsenziyalarni to‘xtatib turish muddatlari, o‘rmon fondi yerlarini ijaraga berish tartibi hamda Davlat xaridlari agentligini tashkil etishni tartibga soladi.
Ayrim qonun hujjatlariga o‘zgartirish va qo‘shimchalar kiritish to‘g‘risidagi qonunga tadbirkorlar va o‘zini o‘zi band qilgan fuqarolar uchun jarayonlarni optimallashtirishga qaratilgan normalar kiritildi. Bu haqda Adliya vazirligi matbuot xizmati xabar berdi.
Qabul qilingan hujjatga muvofiq, hozirda vaqtincha foydalanilmayotgan davlat o‘rmon fondi uchastkalari endilikda jismoniy va yuridik shaxslarga ijaraga berilishi mumkin. Bunday yer uchastkalarini ajratish jarayoni faqat elektron savdo platformasi orqali, onlayn-auksion asosida amalga oshiriladi.
Iqtisodiy protsessual kodeksiga biznes faoliyatini cheklash masalalari bo‘yicha aniqliklar kiritildi. Ayrim faoliyat turlari uchun berilgan ruxsatnoma va litsenziyalar amal qilish muddati 10 kundan 6 oygacha bo‘lgan muddatga to‘xtatib turilishi mumkin. Avvalgi qonunchilikda esa faqat 10 ish kunidan ortiq muddatga to‘xtatish nazarda tutilgan bo‘lib, aniq yuqori chegara belgilanmagan edi.
O‘zgartirishlar “Aholi bandligi to‘g‘risida”gi qonunga ham taalluqli bo‘ldi. O‘zini o‘zi band qilgan shaxslar uchun yillik ixtiyoriy ijtimoiy soliqning minimal miqdori 1 BHM (412 ming so‘m) etib belgilandi. Avval ushbu to‘lovni BHMning 50 foizi miqdorida amalga oshirish mumkin edi.
Shu bilan birga, Prezident farmoniga binoan mamlakatda Sanoat kooperatsiyasi va davlat xaridlari agentligi tashkil etilmoqda. Ushbu sohadagi barcha vazifa va funksiyalar Iqtisodiyot va moliya vazirligidan yangi agentlikka o‘tkaziladi. 2026 yil 1 iyuldan boshlab agentlik ichki va hududiy bozorlarni tahlil qilib, mahalliylashtirish uchun tavsiya etiladigan raqobatbardosh mahsulotlar ro‘yxatini shakllantiradi.
Ushbu ro‘yxatdagi mahsulotlarni ishlab chiqarishni yo‘lga qo‘ygan tadbirkorlar belgilangan tartibda ularni kafolatli xarid qilish bo‘yicha shartnomalar tuzish huquqiga ega bo‘ladi. Shuningdek, endilikda biznes subyektlarining barqarorlik reytingini hisoblashda yaratilgan qo‘shilgan qiymat ulushi ham inobatga olinadi — bu ko‘rsatkich uchun kompaniyalarga qo‘shimcha ball beriladi.