O‘zbekistonda QQSni qaytarish jarayoni avtomatlashishi mumkin
O‘zbekistonda qo‘shilgan qiymat solig‘ini (QQS) qaytarish jarayonini avtomatlashtirish rejalashtirilmoqda
Bu haqda 17-fevral kuni o‘tkazilgan soliq forumida Soliq qo‘mitasi raisi o‘rinbosari Jahongir Abdiyev ma’lum qildi.
Uning aytishicha, 2030-yilgacha mo‘ljallangan soliq siyosati strategiyasi doirasida QQS tizimida joriy yildan boshlab tub o‘zgarishlar amalga oshiriladi. QQS masalasi hozirda tizimdagi asosiy muammolardan biri sifatida baholanmoqda.
Yangi tizimga ko‘ra, soliq to‘lovchi QQSni qaytarish uchun ariza berganda, agar arizaning bir qismi bo‘yicha e’tiroz bo‘lsa, qolgan tasdiqlangan summa avtomatik ravishda qaytariladi. Hozirgi tartibda esa arizada kichik kamchilik aniqlansa ham, butun ariza rad etiladi va qayta topshirishga to‘g‘ri keladi.
Masalan, tadbirkor 1 mln so‘m QQS qaytarishni so‘rasa va 200 ming so‘miga nisbatan savol tug‘ilsa, yangi tizimda 800 ming so‘m darhol qaytariladi, qolgan qismi esa alohida ko‘rib chiqiladi. Bu bahsli masalalarni tezroq va aniqroq hal qilish imkonini beradi.
Shuningdek, kontragentlar bilan bog‘liq muammolarni kamaytirish maqsadida elektron hisobvaraq-fakturalar uchun skoring tizimi ham joriy etilmoqda.
Ma’lumotlarga ko‘ra, 2026-yil 1-yanvar holatida O‘zbekistonda 252,4 mingdan ortiq QQS to‘lovchi mavjud. Ularning eng ko‘pi savdo, qishloq xo‘jaligi va sanoat sohalarida faoliyat yuritadi.
Yangi tizim dastlab loyiha sifatida sinovdan o‘tkaziladi. Jarayon Iqtisodiyot va moliya vazirligi bilan hamkorlikda amalga oshiriladi.