O‘zini o‘zi band qilgan yoshlar uchun kredit 100 million so‘mdan 300 million so‘mgacha oshirildi
O‘zbekistonda o‘zini o‘zi band qilgan yoshlarga beriladigan kredit miqdori uch baravar oshirildi.
Endilikda O‘zbekistonda o‘zini o‘zi band qilgan yoshlar uchun ajratiladigan kredit miqdori 100 million so‘mdan 300 million so‘mgacha oshirildi. Bu haqda prezident Shavkat Mirziyoyev yoshlar bilan uchrashuvda ma’lum qildi.
Davlat rahbari ta’kidlashicha, har yili mehnat bozoriga 600 ming yosh kiradi, 2030-yilgacha esa ularning soni 1 millionga yetadi. Shu bois, yoshlarning o‘ziga mos ish topishi uchun sharoit yaratish muhim masala hisoblanadi.
Yoshlar o‘rtasida o‘tkazilgan so‘rovnomaga ko‘ra, ularning uchdan biri tadbirkor bo‘lishni xohlaydi. O‘tgan yili yoshlar bandligini ta’minlash uchun banklar va Yoshlar ishlari agentligiga 400 million dollar ajratilgan bo‘lsa, endilikda tadbirkor yoshlar uchun qo‘shimcha 200 million dollar mablag‘ ajratilishi e’lon qilindi.
Avval “Aloqabank” yoshlarning biznes loyihalarini qo‘llab-quvvatlovchi tayanch “yoshlar banki”ga aylantirilgan va u 7 yil muddatga 100 million so‘mgacha imtiyozli mikroqarz berar edi. Endilikda bu miqdor 300 million so‘mgacha oshiriladi.
Shuningdek:
- Yosh tadbirkorlar loyihalari uchun kredit limiti 5 milliard so‘mdan 10 milliard so‘mga ko‘tarildi.
- Innovatsion startap loyihalariga 100 ming dollargacha investitsiya kiritish imkoniyati berildi.
- Servis va umumiy ovqatlanish sohasida ish o‘rinlari yaratgan mahalliy brendlardan franshiza olib filial ochishga qiziqqan yoshlar uchun qulay moliyalashtirish paketlari joriy qilinadi.
Prezident yoshlar bandligi masalasiga alohida to‘xtalib, oliygoh rahbarlarini tanqid qildi va Toshkentda Jahon yoshlarining tinchlik sari harakati bosh qarorgohi tashkil etilganini ma’lum qildi. Har payshanba kunini vazirlik, idora va hokimliklarda “Yoshlar kuni” deb belgilash e’lon qilindi.