Pedagoglar uchun ipoteka subsidiyasiga 2 mingdan ortiq ariza topshirildi
Oliy malaka toifasiga ega pedagoglar uchun ipoteka subsidiyasiga arizalar qabul qilinishi boshlangan ilk kunning o‘zida katta talab kuzatildi — 4 soat ichida 2 mingdan ortiq murojaat kelib tushdi.
20-apreldan boshlab oliy malaka toifasiga ega, ya’ni bosh o‘qituvchi lavozimida faoliyat yuritayotgan pedagoglar uchun ipoteka kreditlari bo‘yicha subsidiya ajratish jarayoni boshlandi. Dastlabki soatlardanoq ushbu imkoniyat katta qiziqish uyg‘otdi.
Soat 18:00 holatiga ko‘ra, subsidiya olish uchun jami 2 220 ta ariza kelib tushgan. Bu esa dasturga talab yuqori ekanini ko‘rsatadi.
Arizalar quyidagi tartibda topshirilgan:
- 1 574 ta — my.gov.uz portali orqali
- 402 ta — MyGov mobil ilovasi orqali
- 244 ta — Davlat xizmatlari markazlari orqali
Mutasaddilar eslatishicha, arizalar onlayn tarzda my.gov.uz portali, uning mobil ilovasi hamda hududlardagi Davlat xizmatlari markazlari orqali qabul qilinmoqda.
Mazkur tashabbus pedagoglarning ijtimoiy qo‘llab-quvvatlanishini kuchaytirish, ularning uy-joy sharoitlarini yaxshilashga xizmat qilishi kutilmoqda.