Ramazon oyida ayrim oilalarga 1 mln so‘mdan 1 martalik moddiy yordam beriladi
Ramazon munosabati bilan ehtiyojmand oilalarga moddiy yordam beriladi.
O‘zbekiston hukumati Ramazon oyida ehtiyojmand oilalarni qo‘llab-quvvatlash maqsadida bir qator chora-tadbirlar belgiladi. Prezidentning 2026-yil 17-fevraldagi 67-sonli qaroriga ko‘ra:
- Ayrim oilalarga 1 million so‘mdan bir martalik moddiy yordam beriladi.
- “Kambag‘al oila” toifasidagi oilalar va mahallalar tomonidan shakllantirilgan qo‘shimcha ro‘yxatdagi ehtiyojmand oilalarga 500 ming so‘mdan yordam ajratiladi.
- Ijtimoiy reyestrdagi oilalarning 6 ming nafar bemor a’zolarining davolanish va jarrohlik xarajatlari ham qoplanadi.
Moddiy yordam 1-martga qadar oilalarning ijtimoiy karta yoki bank plastik kartalariga o‘tkaziladi.
Bu tadbirlar Iqtisodiyot va moliya vazirligi hamda Ijtimoiy himoya milliy agentligi tomonidan “Vaqf” xayriya jamoat fondiga ajratiladigan 800 milliard so‘m mablag‘ hisobidan moliyalashtiriladi.
Shuningdek, elektron ro‘yxatlar besh kun ichida shakllantiriladi, qo‘shimcha ro‘yxatlar tuman va shahar hokimliklari tomonidan tasdiqlanadi. Sog‘liqni saqlash tizimida davolanish va jarrohlik amaliyotlarini tashkil etish uchun maxsus axborot moduli joriy qilinadi.
Prezident Shavkat Mirziyoyev huzurida o‘tkazilgan yig‘ilishda “Ramazon — mehr-muruvvat, ahillik va shukronalik oyi” shiori ostida kompleks chora-tadbirlar ishlab chiqilgani ma’lum qilingan, ularga “Vaqf” fondi orqali 750 mlrd so‘m, Ijtimoiy himoya milliy agentligi orqali esa 300 mlrd so‘m ajratilishi belgilangan.
Ramazon oyining boshlanishi 2026-yil 19-fevralga to‘g‘ri keladi. Shu bilan birga, zakot nisobi, fitr sadaqa va fidya miqdorlari ham e’lon qilingan.