Yaponiyada o‘zbekistonliklar uchun kamida 2 ming dollarlik ish o‘rinlari taklif etilmoqda
Yaponiyada demografik inqiroz sababli yuzaga kelgan ishchi kuchi tanqisligini bartaraf etish maqsadida o‘zbekistonlik mutaxassislarni jalb qilish bo‘yicha yangi loyihalar amalga oshirilmoqda.
Bu haqda “Dunyo” axborot agentligi xabar berdi.
Yaponiya iqtisodiyotining turli sohalariga xorijiy ishchi kuchini qonuniy va tizimli tarzda jalb qilish bilan shug‘ullanuvchi Proud and Partners kompaniyasi prezidenti Ryuji Suzukining ma’lum qilishicha, mamlakatda logistika, qurilish va umumiy ovqatlanish kabi asosiy tarmoqlarda kadrlar yetishmovchiligi kuchayib bormoqda.
Uning aytishicha, kompaniya xorijdan tayyor ishchi olib kelishdan ko‘ra, mutaxassislarni o‘z davlatida til va kasb bo‘yicha tayyorlash, malakasini oshirish va aniq ish o‘rinlari bilan ta’minlash tamoyiliga asoslangan.
“Loyiha doirasida, avvalo, yuk avtomobili haydovchilarini tayyorlashni boshladik. O‘zbekiston fuqarolari uchun oyiga kamida 2 ming AQSh dollari va undan yuqori maosh taklif etishni asosiy shart sifatida belgilaganmiz”, — dedi Ryuji Suzuki.
Qayd etilishicha, loyiha doirasida faoliyat yo‘nalishlarini bosqichma-bosqich kengaytirish rejalashtirilgan. Xususan, Qoraqalpog‘iston davlat universiteti bilan hamkorlikda umumiy ovqatlanish sohasi uchun mutaxassislar tayyorlash dasturi yo‘lga qo‘yilgan bo‘lib, dastlab yuz nafarga yaqin kadr tayyorlanishi ko‘zda tutilmoqda.
Bundan tashqari, O‘zbekiston Migratsiya agentligi bilan hamkorlikda qurilish sohasi uchun mutaxassislar tayyorlash bo‘yicha ham rejalar ishlab chiqilmoqda.
Kompaniya rahbarining so‘zlariga ko‘ra, dastlab loyiha 100 nafar ishtirokchi bilan cheklanishi rejalashtirilgan bo‘lgan. Biroq O‘zbekistondagi kadrlar salohiyati va joriy tizim bilan yaqindan tanishilgach, hamkorlik ko‘lamini kengaytirish imkoniyati paydo bo‘lgan.
Ayni paytda 500 nafarga yaqin mutaxassisni tayyorlash ishlari amaliy bosqichga o‘tgan. Kelgusida esa ushbu ko‘rsatkichni 5 ming nafargacha yetkazish rejalashtirilmoqda.
Ta’kidlanishicha, Proud and Partners kompaniyasi faoliyati nafaqat kadrlarni tayyorlash va ish beruvchilar bilan bog‘lash, balki o‘zbekistonlik mutaxassislarni qabul qilgan yapon kompaniyalariga O‘zbekistonda yangi biznes yo‘nalishlarini yo‘lga qo‘yishda ham ko‘maklashishni o‘z ichiga oladi.
Yangiliklarni baham ko'ring
Sizga yoqadi
