Yuqori sig‘imli SSD’lar oltindan qimmatlashmoqda
So‘nggi tahlillarga ko‘ra, yuqori sig‘imli NVMe SSD’lar narxi keskin oshgan.
Xususan, 8 terabaytli zamonaviy SSD’lar hozirda 1400–1500 AQSh dollari atrofida baholanmoqda. Mazkur qurilmalarning vazni taxminan 8 grammni tashkil etadi.
Taqqoslash uchun, oltinning jahon bozoridagi narxi o‘rtacha 148 dollar/gramm atrofida. Natijada ayrim SSD’lar og‘irligi bo‘yicha hisoblanganda oltindan ham qimmatroq bo‘lib chiqmoqda.
Mutaxassislar bu holatni NAND flash xotiraga bo‘lgan talabning keskin oshishi bilan izohlamoqda. Sun’iy intellekt, serverlar va bulutli xizmatlar rivoji katta hajmdagi tezkor xotiraga ehtiyojni kuchaytirgan. Shu bilan birga, ekspertlar SSD’larni investitsiya vositasi sifatida baholamaslik kerakligini, ularning narxi bozor sharoitiga qarab o‘zgarishini ta’kidlashmoqda.
Ma'lumot uchun, SSD (Solid-State Drive) — kompyuter va noutbuklarda ma’lumot saqlash uchun qo‘llaniladigan zamonaviy xotira qurilmasi hisoblanadi. An’anaviy qattiq disklar (HDD)dan farqli o‘laroq, SSD’da aylanadigan disklar yoki mexanik harakatlanuvchi qismlar mavjud emas. Ma’lumotlar to‘liq elektron NAND flash xotirada saqlanadi.
Mazkur texnologiya tufayli SSD’lar yuqori tezlikda ma’lumot o‘qish va yozish, kam energiya sarflash hamda tashqi ta’sirlarga nisbatan bardoshlilik bilan ajralib turadi. Natijada operatsion tizimning ishga tushishi, dasturlarning ochilishi va umumiy tizim tezligi sezilarli darajada oshadi.
Yangiliklarni baham ko'ring
Sizga yoqadi
