2026-yildan O'zbekistonda imtiyozli ipoteka limiti qanchaga oshiriladi?
2026-yildan O‘zbekistonda bitta xonadon uchun ajratiladigan imtiyozli ipoteka krediti miqdori 15 foizga oshiriladi.
2026-yildan O‘zbekistonda bitta xonadon uchun ajratiladigan imtiyozli ipoteka krediti miqdori 15 foizga oshiriladi. Bu haqda prezident Shavkat Mirziyoyev 26 dekabr kuni Oliy Majlis va xalqga yo‘llagan murojaatnomasida ma’lum qildi.
Davlat rahbari mamlakatni 2026-yilda ijtimoiy-iqtisodiy rivojlantirishning ustuvor yo‘nalishlaridan biri sifatida ichki bozorda talabni rag‘batlantirish masalasiga to‘xtalar ekan, aholi daromadlari va xarid qobiliyatini oshirishga qaratilgan ishlar izchil davom ettirilishini ta’kidladi.
Qayd etilishicha, kelgusi yilda aholining ehtiyojidan kelib chiqib, iqtisodiyotda eng katta talab yaratuvchi sohalardan biri bo‘lgan uy-joy ipotekasiga 23 trln so‘m miqdorida resurs yo‘naltiriladi.
“Uy-joy sotib olishda boshlang‘ich to‘lov va foiz to‘lovlarining bir qismini qoplash uchun 2 trln 700 mlrd so‘m subsidiya ajratiladi. Shuningdek, bitta kvartira uchun beriladigan imtiyozli ipoteka kreditining miqdori 15 foizga oshiriladi”, — dedi prezident.
Ma’lumot uchun, hozirda imtiyozli ipoteka kreditining maksimal miqdori Toshkent shahrida 420 mln so‘m, hududlarda esa 330 mln so‘mni tashkil etadi. 2026-yildan ushbu limitlar mos ravishda 483 mln so‘m va 380 mln so‘mgacha oshiriladi.
Shuningdek, kelgusi yilda 140 ming xonadonga mo‘ljallangan ko‘p qavatli uy-joylar qurilishi rejalashtirilgan. Bu zarur iste’mol tovarlariga talab oshishini inobatga olib, 2026-yilda 125 trln so‘mlik iste’mol kreditlari ajratilishi ko‘zda tutilmoqda.
Prezident so‘zlariga ko‘ra, 2026-yilda qurilish ishlari hajmini 11 foizga oshirib, 30 mlrd dollarga yetkazish rejalashtirilgan.
