2039 yilga borib odamlar o‘lmaydigan bo‘ladimi? Milliarder bioxaker Bryayan Jonsonning shov-shuvli da’vosi
Milliarder, bioxaker va texnoentuziast Bryayan Jonson insoniyat yaqin 15 yil ichida o‘lmaydigan bo’lishi mumkinligini da’vo qilmoqda.
Fortune nashriga ko‘ra, Jonson sun’iy intellektni o‘zining “asosiy shifokori” sifatida ishlatadi va biologik qarishni to‘xtatish mumkinligiga ishonadi.
Jonson jamoatchilik e’tiboriga o‘zining noodatiy tajribalari bilan tushgan. U hatto bir vaqtlar 17 yoshli o‘g‘lidan qon plazmasini qabul qilgani bilan ham tanilgan. Uning aytishicha, AI, genomika va ilg‘or tibbiyot yutuqlari birlashsa, saraton va qarish kabi muammolarni nazortaga olish mumkin bo‘ladi.
Milliarderning fikricha, sun’iy intellekt inson tanasidagi milliardlab biologik jarayonlarni bir vaqtning o‘zida tahlil qilib, kasalliklarni erta bosqichda aniqlaydi va qarishni sekinlashtiradi. Aynan shu texnologiyalar 2039 yilga borib odam umrini cheksiz darajada uzaytirishga yordam berishi mumkin.
Biroq ko‘plab olimlar va shifokorlar bu bayonotlarga ehtiyotkorlik bilan qaramoqda. Mutaxassislar hozirgi ilm-fan qarishni sekinlashtirish yo‘lida sezilarli yutuqlarga erishganini tan olsa-da, to‘liq o‘lmaslik hali ilmiy jihatdan isbotlanmaganini ta’kidlaydi.
Shunga qaramay, Bryayan Jonsonning tajribalari va bayonotlari butun dunyoda muhokamalarga sabab bo‘lib, sun’iy intellekt va biotexnologiyalarning kelajakdagi imkoniyatlariga bo‘lgan qiziqishni yanada kuchaytirmoqda.
