37 ta og‘ir tumanda oilaviy tadbirkorlik kreditlari 12 foizga tushiriladi
37 ta “og‘ir” tuman uchun oilaviy tadbirkorlik dasturi doirasida kreditlar 12 foiz stavkada ajratiladi. Avval bu ko‘rsatkich 17,5 foizni tashkil etgan.
2026-yilda kambag‘allikni qisqartirish va aholi bandligini ta’minlash bo‘yicha asosiy vazifalar muhokamasiga bag‘ishlangan videoselektor yig‘ilishida prezident Shavkat Mirziyoyev kichik va o‘rta biznesni qo‘llab-quvvatlashga oid muhim yangiliklarni ma’lum qildi.
Yig‘ilishda qayd etilishicha, kelasi yilda kichik va o‘rta biznesni rivojlantirish uchun jami 140 trillion so‘m kredit ajratiladi. Shu bilan birga, hududlar imkoniyati va sharoitlari bir-biridan keskin farq qilishi inobatga olinib, kredit siyosatiga o‘zgartirishlar kiritiladi.
Davlat rahbari ta’kidlashicha, hozirgacha banklar tomonidan barcha tuman va shaharlarga bir xil shartlarda kredit taklif etilib kelinmoqda. Endilikda esa 37 ta “og‘ir” tuman uchun oilaviy tadbirkorlik dasturi doirasida kreditlar 12 foiz stavkada ajratiladi. Avval bu ko‘rsatkich 17,5 foizni tashkil etgan.
Shuningdek, barcha tumanlarda oilaviy tadbirkorlik bo‘yicha imtiyozli kreditlarning maksimal miqdori 1,5 barobarga oshirilib, 50 million so‘m etib belgilandi. Import qilingan va sertifikatlangan naslli chorva xaridi uchun esa kredit miqdori 100 million so‘mgacha yetkaziladi.
Bundan tashqari, uy mehmonxonalari, kichik hajmli muzlatkichlar, mahsulot saqlash va qayta ishlash bo‘yicha mini texnologiyalar uchun 150 million so‘mgacha garovsiz kredit ajratilishi belgilandi.
Chegara va anklav hududlarda joylashgan 562 ta mahalladagi tadbirkorlik loyihalari uchun kredit miqdori 1 milliard so‘mgacha oshiriladi.
Mazkur chora-tadbirlarni moliyalashtirish maqsadida joriy yilda oilaviy tadbirkorlik dasturlariga rejalashtirilgan 3,6 trillion so‘mga qo‘shimcha ravishda yana 2 trillion so‘m resurs yo‘naltiriladi.
Shu bilan birga, mahallalar ixtisoslashuvini chuqurlashtirish uchun banklar tomonidan 17 trillion so‘mlik kreditlar ajratiladi. Bu jarayonda mahsulot yetishtirish loyihalarida kredit summasining 4 foizi, qayta ishlash loyihalarida esa 6 foizi qoplab beriladi.
