An’anaviy uylar o’rniga ko’chma avtouylar ommalashyapti – avtofurgonlar uy tushunchasini qanday o’zgartiryapti?
AQShda so’nggi yillarda avtouy egalari soni 26 foizga oshgan. Odamlar nega avtouylarni tanlayapti, ularda yetarli qulayliklar bormi?
So’nggi yillarda dam olish transporti — avtofurgonlar internet, hojatxona va boshqa qulayliklari bor to‘liq uyga aylanib boryapti. Avtoular qanday ommalashyotgani, avtouy sotib olishni istaganlar hojatxona, internet va elektr energiyasi muammolarni qanday hal qilayotgani va sohada qanday innovatsiyalar paydo bo‘layotgani haqida The New York Times nashri hikoya qiladi.
Airstream kompaniyasining Bambi treyleri
Shimoliy Amerikada 11,2 million oila treylerlarga egalik qiladi. Nashr ma’lumotlariga ko‘ra, 2011–2021 yillar oralig‘ida avtouy egalari soni 26 foizga oshgan.
Masalan, Britani va Isaak Garrettlar Virjiniya shtatidagi uylarini sotib, pikaplariga 22 futli treyler ulab, AQSh bo‘ylab sayohatga chiqishgan. “Biz 25 yoshdamiz va farzandimiz yo‘q. Jamiyat bu yoshda katta uy kerak degan fikrni singdiradi, ammo aslida bunga ehtiyojimiz yo‘q edi. Shuning uchun yashash maydonini kichraytirdik”, - deydi Britani Garrett
Yo‘lda o‘tkazilgan to‘rt oy Britanida ijobiy taassurot qoldirgan. Uning aytishicha, bunday hayotda “buyumlar kamroq, ammo hayotning o‘zi ko‘proq.
Avtodomlardagi mashhur yangiliklar
Treyler ishlab chiqaruvchi Airstream kompaniyasi prezidenti Bob Uiller modellar doimiy ravishda yangilanib borayotganini aytadi. Uning fikricha, keyingi katta yutuqlar quyidagilar bo‘lishi mumkin:
– ichiga quyosh panellari o‘rnatilgan ochiluvchi ayvonlar;
– rakovina, dush, kir yuvish va idish-tovoq yuvish mashinalaridan chiqqan suvni qayta ishlatish texnologiyalari.
Kolorado shtatidan nafaqadagi yurist Keri Olbern, o‘smirlik davridan beri avtokempinglarda yashab keladi. “So‘nggi bir necha yil ichida avtodom sanoatidagi texnologik sakrash hayratlanarli, ayniqsa bu sohani anchadan beri kuzatib kelayotganlar uchun”, – deydi u.
Dave’s RV Center brendi rahbari Deyv Simsoning fikricha, bu sohadagi taraqqiyot shunchalik yuqoriki, g‘ildirakli uy egasi hayot uchun zarur bo‘lgan narsalarsiz qolib ketishi deyarli imkonsiz.
Yuqori texnologiyali treylerlarga misol sifatida nashr Newmar furgonlarini keltiradi — ularning narxi 200 ming dollardan boshlanib, 1,3 million dollargacha yetadi.
Shu bilan birga, Dave’s RV Center bosh menejerining aytishicha, arzon avtouy ishlab chiqaruvchilar ham ortda qolmaslikka harakat qilmoqda. Va hatto mikroto‘lqinli pechlar va DVD-pleyerlar ham kiritishga harakat qilishmoqda.
Avtofurgonlarning ikkilamchi bozori eski modellarni yangilash imkonini beradi. Eng katta qiziqish 3 narsaga qaratilgan: hojatxonalar, elektr ta’minoti va internet.
Hojatxonalar qanday hal bo’lyapti?
Bu sohadagi innovatsiyalar yo‘ldagi noqulayliklarni kamaytirishga qaratilganini aytadi RV Designer kompaniyasi prezidenti Jon Tingitell.
Ba’zi avtodom egalari treylerni kempingda qoldirib, kanalizatsiyaga ulashadi. Aks holda, yig‘ma bakni maxsus drenaj stansiyalarida bo‘shatish kerak bo‘ladi. Biorq hojatxonalarning quyidagi turlari ham bor:
Kompostli hojatxona — suyuq va qattiq chiqindilarni ajratadi, qattiq chiqindilar kompostlanadi.
Kassetali hojatxona — chiqindilar konteynerda yig‘iladi, keyin u chiqarilib bo‘shatiladi.
Yondiruvchi hojatxona — chiqindilarni metall idishda yoqib yuboradi.
Portativ elektr ta’minoti
Ko‘plab avtokempinglarda har bir joyda elektr rozetkalari mavjud. Ammo elektrsiz hududlarda yashash uchun yoritish, isitish va elektron qurilmalarni quvvatlash manbai kerak bo‘ladi. Gaz generatorlari bunga mos keladi, ammo ular shovqinli va zararli gazlar chiqaradi. Shu sababli, nashrga ko‘ra, litiy-ion batareyalar ommalashgan.
Kanadalik Pleasure-Way Industries kompaniyasi savdo vakilining aytishicha, bunday akkumulyatorlar o‘rnatilishi avtodomlardan deyarli istalgan joyda foydalanish imkonini beradi.
Masalan, Karen va Rey Abramsonlar (Konnektikut shtati, Vestport) 2019 yilda ishlatilgan Pleasure-Way avtodomini sotib olishdi. U litiy-ion batareyalar va ularni quvvatlaydigan quyosh panellari bilan jihozlangan edi. Reyning aytishicha, zaryad taxminan besh kunga yetadi.
