Ayrim talabalarning turar-joydagi yashash xarajatlari davlat tomonidan qoplab beriladi
Hukumat 28 yanvar, 2026 yilda (32-son qarori) “Ayrim toifadagi talabalarning davlat oliy ta’lim tashkilotlari talabalari turar-joylaridagi yashash xarajatlarini qoplab berish tartibi to‘g‘risida”gi nizomni tasdiqladi.
Nizomgako‘ra, yashash xarajatlari davlat oliy ta’lim tashkilotlarining faqat kunduzgi ta’lim shaklida ta’lim olayotgan talabalari, davlat granti yoki to‘lov-kontrakt asosida o‘qishidan qat’iy nazar, davlat byudjeti hisobidan qoplab beriladi.
Bu imtiyoz oilasi Ijtimoiy reyestrda “kambag‘allik chegarasidagi oila” sifatida ro‘yxatga olingan talabalar uchun 12 oy davomida taqdim etiladi.
Talabalar ustuvorlik asosida, navbatsiz ravishda davlat oliy ta’lim tashkiloti talabalari turar-joyiga qabul qilinadi.
Ariza berish uchun talabalar o‘z oliy ta’lim tashkiloti rektori (filial direktori) nomiga oyning 7-sanasiga qadar murojaat qilishlari mumkin, shuningdek kontrakt.edu.uz orqali mustaqil ariza yuborish imkoniyati ham mavjud.
Ariza tegishli o‘quv yili uchun bir marotaba yuboriladi.
Fakultetlarda yoshlar bilan ishlash bo‘yicha dekan o‘rinbosarlari arizalarni 1 kun ichida elektron shaklda yig‘ib, komissiyaga taqdim etadi. Komissiya tomonidan arizalar 1 kun ichida ko‘rib chiqilib, tegishli qaror qabul qilinadi.
