Mahalliy va xorijiy elektromobillar uchun imtiyozli avtokreditlar joriy etiladi
Mahalliy elektromobillar uchun yillik 12 foiz, xorijiy elektromobillar uchun esa 16 foiz stavkada kredit ajratilishi ma'lum qilindi.
Prezidentning Oliy Majlisga va O‘zbekiston xalqiga yo‘llagan Murojaatnomasida ekologik toza transport vositalarini keng joriy etish bo‘yicha yangi tashabbuslar e’lon qilindi.
Qayd etilishicha, elektromobillar ulushini oshirish maqsadida 5 yillik maxsus dastur amalga oshiriladi. Dastur doirasida mahalliy ishlab chiqarilgan elektromobillarni xarid qilish uchun yillik 12 foizli, xorijiy elektromobillar uchun esa 16 foizli imtiyozli avtokreditlar ajratiladi.
Shuningdek, elektromobillarni quvvatlash infratuzilmasini rivojlantirishga alohida e’tibor qaratiladi. Quvvatlash stansiyalarini tashkil etuvchi tadbirkorlarga 10 foizli imtiyozli kreditlar beriladi, yer uchastkalarini auksion orqali bozor narxidan ikki baravar arzon sotib olish imkoniyati yaratiladi.
Bundan tashqari, zaryadlash stansiyalarida elektr energiyasi uchun belgilangan tarifning 1 kilovatt-soati 300 so‘mdan oshgan qismi davlat budjeti hisobidan qoplab berilishi ko‘zda tutilmoqda.
Elektromobilda taksi xizmati ko‘rsatuvchi fuqarolar uchun ham bir qator imtiyozlar joriy etilishi ma’lum qilindi. Bu chora-tadbirlar ekologik transportdan foydalanishni rag‘batlantirishga qaratilgan.
Avvalroq, joriy yil sentabr oyida O‘zbekistonda elektromobillar savdosi rekord darajaga yetgani haqida xabar berilgandi.
