Nega ChatGPT 2027-yil o‘rtalariga borib o‘z faoliyatini to‘xtatishi mumkin?
OpenAI’ning kelajagi savol ostida qolyapti. Tahlilchilarga ko‘ra, ChatGPT’ni yaratgan kompaniya 2027-yil o‘rtalariga borib qulash xavfiga duch kelishi mumkin. Startapning omon qolishi keskin daromad o‘sishi va doimiy yangi investitsiyalar oqimiga bog‘liq, aks holda kompaniya moliyaviy yukni ko‘tara olmasligi aytilyapti.
NYT ma’lumotlariga ko‘ra, 2025-yilda OpenAI’ning operatsion xarajatlari qariyb 8 milliard dollarni tashkil etgan. 2028-yilga kelib bu raqam 40 milliard dollargacha oshishi kutilmoqda. Bunday yirik xarajatlarga qaramay, kompaniyada hanuzgacha barqaror biznes-model mavjud emas, foydasizlikdan chiqish esa 2030-yildan oldin kutilmayapti.
Loyihaning asosiy zaif tomoni — auditoriya tuzilmasidir. Foydalanuvchilarning aksariyati chat-botlarning bepul versiyalarini afzal ko‘radi va ularga pullik obuna majburan taklif etilsa, ehtimol raqobatchilarga o‘tib ketadi. Google, Meta yoki Microsoft’dan farqli o‘laroq, OpenAI’da sun’iy intellekt yo‘nalishini subsidiyalash uchun boshqa daromad manbalari yo‘q, bu esa kompaniya holatini yanada qiyinlashtiradi.
Najot sifatida sun’iy intellekt agentlarining keng miqyosda joriy etilishi ko‘rilmoqda. Agar ular kundalik hayotda ajralmas vositaga aylansa, xizmatning qiymati sezilarli darajada oshadi. Biroq ishlab chiquvchilarda ushbu texnologik o‘tish davrini kutib olish uchun yetarli resurslar bormi — bu hali ham noma’lum.
Tahlilchilar OpenAI holdan toygan holatda yirik texnologik gigantlardan biri — masalan, Microsoft yoki Amazon tomonidan sotib olinishi mumkin bo‘lgan ssenariyni ham inkor etishmaydi. Shu bilan birga, ekspertlar bozor yetakchisining ehtimoliy bankroti sun’iy intellekt texnologiyasining o‘zi uchun yakun bo‘lmasligini ta’kidlaydi.
«OpenAI’ning qulashi sun’iy intellektning muvaffaqiyatsizligi degani emas. Bu shunchaki uni qurgan eng ko‘p reklama qilingan kompaniyaning yakuni bo‘ladi», — deyiladi nashrda.
