Nomimga boshqalar kredit olishini qanday taqiqlashim mumkin?
Bugungi kunda shaxsiy ma'lumotlarni o‘g‘irlash orqali fuqarolar nomiga firibgarlar tomonidan kredit rasmiylashtirish holatlari uchrab turibdi. Bunday xavfning oldini olishning eng samarali va oson yo‘li — My.gov.uz portali orqali kredit olishga ixtiyoriy taqiq qo‘yishdir.
Quyida kreditni taqiqlash xizmatini yoqish bo‘yicha bosqichma-bosqich ko‘rsatmani taqdim etamiz:
1-bosqich: Ilovani yuklab olish va ro‘yxatdan o‘tish
Smartfoningizga My.gov.uz mobil ilovasini App Store yoki Play Market’dan yuklab oling. Ilovada maxfiylik siyosati bilan tanishib, uni tasdiqlang. OneID yoki MyID tizimi orqali avtorizatsiyadan o‘ting. MyID orqali kirishda pasport ma’lumotlaringizni kiritib, yuzingizni kameraga to‘g‘rilash orqali shaxsingizni tasdiqlashingiz kifoya.
2-bosqich: Xavfsizlik sozlamalari
Tizimga muvaffaqiyatli kirgach, xavfsizlik uchun 4 raqamli PIN-kod o‘rnating. Qo‘shimcha himoya uchun barmoq izi yoki yuzni tanish (biometrika) funksiyasini yoqish tavsiya etiladi.
3-bosqich: Xizmatni faollashtirish
Ilova menyusidan "Xizmatlar" bo‘limiga o‘ting va "Iqtisodiyot va biznes" sohasini tanlang. Ro‘yxatdan "Kredit bitimini tuzishga taqiq qo‘yish yoki taqiqni olib tashlash" xizmatini toping. "Xizmatni faollashtirish" tugmasini bosing.
4-bosqich: Natijani tekshirish
Tugma bosilishi bilan ma’lumotlaringiz kredit bitimi tuzishi taqiqlangan shaxslar reyestriga kiritiladi. Xizmat yakunida sizga maxsus QR-kodli ma’lumotnoma taqdim etiladi, uni yuklab olishingiz mumkin.
Xizmatning asosiy afzalliklari nimada?
Birinchidan, bu firibgarlikdan ishonchli himoya demakdir. Agar ushbu xizmatni faollashtirib qo‘ysangiz, tizim sizning nomingizdan yangi kredit shartnomalari tuzilishiga yo‘l qo‘ymaydi. Bu esa o‘z navbatida kredit olish jarayonini to‘liq nazorat qilish va kutilmagan moliyaviy muammolarning oldini olish imkonini beradi.
Ikkinchidan, tezkorlik va qulaylik. Jarayonni amalga oshirish uchun bankma-bank yurish yoki qog‘ozbozlikka hojat yo‘q; barcha harakatlar bir necha daqiqa ichida, ortiqcha hujjatlarsiz mobil ilova orqali bajariladi.
To‘liq nazorat va shaffoflik
Foydalanuvchilar nafaqat taqiq qo‘yishlari, balki jarayonni monitoring qilib borishlari ham mumkin. Ilovadagi "Xizmat bo‘yicha harakatlar tarixi" tugmasi orqali qachon taqiq qo‘yilgani yoki qachon olib tashlanganini istalgan vaqtda kuzatib borish imkoniyati mavjud. Tizimning shaffofligi shundaki, har bir bosqichda foydalanuvchiga xizmat holati haqida batafsil ma’lumot berib boriladi.
Rasmiy tasdiq va yuridik kuch
Ko‘pchilik uchun bajarilgan ishning rasmiy tasdig‘i muhim sanaladi. Taqiq muvaffaqiyatli qo‘yilganidan so‘ng, natija bo‘yicha maxsus ma’lumotnomani yuklab olishingiz mumkin. Ushbu hujjat QR-kod bilan himoyalangan bo‘lib, uning haqiqiyligini tekshirish juda oson. Eng asosiysi, xizmat faol holatda bo‘lsa, hech kim sizning nomingizdan kredit rasmiylashtira olmaydi.
Bu xizmatni qanday o’chirish mumkin?
Agar sizga haqiqatda kredit kerak bo‘lib qolsa, istalgan vaqtda ushbu bo‘limga kirib, "Xizmatni o‘chirish" tugmasini bosishingiz mumkin. Xizmat faol holatda bo‘lsa, hech kim (hatto o‘zingiz ham) nomingizga kredit rasmiylashtira olmaydi. Bu firibgarlardan himoyalanishning 100% kafolatlangan usulidir.
