O‘zbekistonda elektr energiyasi uchun soatbay tariflar joriy etilishi mumkin
O‘zbekistonda elektr energiyasi iste’moli uchun sutka va mavsumga qarab farqlanadigan soatbay tariflar joriy etilishi rejalashtirilmoqda.
Bu haqda energetika vaziri Jo‘rabek Mirzamahmudov Oliy Majlis Qonunchilik palatasidagi hisobotida ma’lum qildi.
Yangi tizim elektr energiyasini real vaqt rejimida hisobga olish imkonini beruvchi ASKUE (“aqlli” hisoblagichlar) asosida ishlaydi. Tariflar sutka davomida o‘zgarib boradi: kechki eng yuqori yuklama soatlarida narx qimmatroq, tungi va past yuklama paytlarida esa arzonroq bo‘lishi mumkin.
Energetika vazirligi bu orqali energiya tizimidagi yuklamani muvozanatlashtirish va iste’molchilarni elektrdan oqilona foydalanishga rag‘batlantirishni maqsad qilgan. Xususan, elektromobillarni tungi va kunduzgi past yuklama vaqtida quvvatlash arzonroq bo‘lishi kutilmoqda.
Shu bilan birga, markazlashgan gaz ta’minoti mavjud bo‘lmagan hududlarda yashovchi aholi, elektr isitish va elektr plitalardan foydalanadigan xonadonlar uchun 50 foizgacha chegirmali tariflar joriy etilishi rejalashtirilgan. Isitish mavsumida bunday imtiyozlar kengroq iste’mol hajmlariga tatbiq etilishi mumkin.
Hozirda loyiha idoralararo kelishuv va texnik audit bosqichida. Yakuniy qaror infratuzilmaning tayyorgarligi va hisob-kitoblar natijasidan so‘ng qabul qilinadi.
