O‘zbekistonda kimlar avtomobilda xavfsizlik kamarini taqishdan ozod etiladi?
O‘zbekistonda ayrim toifadagi fuqarolar avtomobilda xavfsizlik kamarini taqishdan ozod etiladi.
Salomatligi tufayli xavfsizlik kamaridan foydalanishi mumkin bo‘lmagan shaxslar uchun kasalliklar va holatlar ro‘yxati rasman tasdiqlandi. Bu haqda Adliya vazirligi matbuot xizmati ma’lum qildi.
Qayd etilishicha, mazkur ro‘yxat davlat ro‘yxatidan o‘tkazilgan bo‘lib, unda avtomobilda xavfsizlik kamarini taqish imkonini bermaydigan 20 turdagi kasallik va holatlar keltirilgan. Ushbu asoslar mavjud bo‘lgan fuqarolarga QR kodli maxsus tibbiy ma’lumotnoma beriladi.
Ma’lumotnoma “Elektron sog‘liqni saqlash” axborot tizimi orqali rasmiylashtiriladi va bemor biriktirilgan birlamchi tibbiy-sanitariya yordami muassasasi yoki u davolangan davlat tibbiyot muassasasi tomonidan bepul taqdim etiladi. Hujjat, asosan, 1 yil muddatga beriladi, biroq ayrim holatlarda uning amal qilish muddati 2, 4 yoki 6 oy etib belgilanishi mumkin.
Xavfsizlik kamarini taqishdan ozod etuvchi kasallik va holatlar ro‘yxatiga quyidagilar kiritilgan:
- O‘mrov va to‘sh suyagi sinishi;
- Yelka kamari sinishi;
- Qovurg‘alar sinishi;
- Chap o‘mrov suyagi chiqishi tufayli o‘tkazilgan operatsiyalar;
- Chap o‘mrov suyagining soxta bo‘g‘imi sinishi;
- Umurtqa pog‘onasining kompression sinishi;
- O‘pkaning surunkali obstruktiv kasalliklari (IV bosqich);
- Bronxial astma (IV bosqich);
- O‘pkaning interstitsial zararlanishi (fibroz va boshqalar);
- O‘pkaning bir qismi yoki butun qismining (chap yoki o‘ng) olib tashlanishi (lobektomiya, pnevmonektomiya);
- Surunkali yurak yetishmovchiligining III bosqichi va dekompensatsiya bosqichi;
- Og‘ir yurak-qon tomir kasalliklari (o‘tkazilgan infarktlar, ishemiya va boshqalar);
- III darajali (morbid) semizlik (Tananing massa indeksi ≥ 40);
- Past bo‘yli (nanizm) 150 santimetrdan past;
- Qo‘l yoki kelka harakatini cheklovchi nevrologik kasalliklar;
- Tananing ko‘krak qismida joylashgan og‘ir allergik yoki dermatologik kasalliklarning og‘ir shakllari (ekzema, psoriaz va boshqalar);
- O‘mrov, kurak, yelka, to‘sh suyaklari va qovurg‘alarda ichki va tashqi implantlarning mavjudligi;
- Ko‘krak qafasi va qorin bo‘shlig‘ida o‘tkazilgan ochiq turdagi operatsiyalar;
- Stomalar mavjud bo‘lishi;
- Ko‘krak qafasi sohasidagi yirik hosilalar (o‘sma).
Eslatib o‘tamiz, O‘zbekistonda 2025-yil 1-avgustdan boshlab avtomobilda xavfsizlik kamarini taqmaganlik uchun jarima miqdori 206 ming so‘m etib belgilangan. Shu bois, xavfsizlik kamarini taqishdan ozod etiluvchi shaxslar tegishli tibbiy ma’lumotnomani o‘zida olib yurishi lozim.
