Pekinda odamsimon robotlarni tayyorlash markazi ish boshladi
Xitoy poytaxti Pekinda odamsimon (humanoid) robotlarni real ish sharoitlariga moslashtirishga ixtisoslashgan maxsus trening markazi o‘z faoliyatini boshladi.
Ma’lumqilinishicha, mazkur markaz klassik ta’lim muassasasi emas, balki robotlarga sanoat, logistika va kundalik hayotga oid vazifalarni bajarishni o‘rgatishga mo‘ljallangan amaliy tayyorlov bazasi hisoblanadi. Uning asosiy maqsadi ishlab chiqarish korxonalari, tibbiyot muassasalari va maishiy sohada ishlay oladigan yordamchi robotlarni tayyorlashdan iborat.
Ikki qavatli markaz hududida ishlab chiqarish liniyalari, yashash xonalari va logistika terminallarining real o‘lchamdagi nusxalari barpo etilgan. Ushbu makon ko‘proq laboratoriyadan ko‘ra, turli ssenariylar sinovdan o‘tkaziladigan trening maydonchasini eslatadi.
Markazda, xususan, bo‘yi 1,66 metr bo‘lgan “Kuafu” nomli odamsimon robot modeli real ish muhitiga yaqin sharoitlarda sinovdan o‘tkazilmoqda. Trening modullari turli vaziyatlarni taqlid qilish maqsadida muntazam ravishda qayta konfiguratsiya qilinadi.
Robotlarni o‘qitish jarayoni individual yondashuv asosida tashkil etilgan. Har bir robot bilan ikki nafar murabbiy ishlaydi: ulardan biri VR qurilmalari orqali robotning harakatlarini masofadan boshqaradi, ikkinchisi esa sensorlardan kelayotgan ma’lumotlarni qayd etib, tahlil qiladi. Ma’lumotlarning aniqligini ta’minlash uchun murabbiylar ma’lum vaqtdan so‘ng rollarini almashtirib boradi.
Markaz rahbari Chju Kayning ta’kidlashicha, robotlarga ham bolalarga o‘xshab, turli vaziyatlarda takroriy mashqlar orqali ko‘nikmalarni shakllantirish zarur. Masalan, robotga oddiy maishiy harakat — tovani ehtiyotkorlik bilan plitaga qo‘yishni o‘rgatish uchun ushbu jarayon 1250 marta takrorlangan.
Qayd etilishicha, bitta murakkab ssenariyni to‘liq o‘zlashtirish uchun hatto tajribali murabbiylarga ham 7–8 kun vaqt talab etiladi. Ayni paytda markazda 110 nafar yosh mutaxassis faoliyat yuritmoqda.
