Senat PayPal, Apple Pay va Google Pay faoliyatini yengillashtirishga qaratilgan qonun o‘zgarishlarini ma’qulladi
Senatning 13-yalpi majlisida “Shaxsga doir ma’lumotlar to‘g‘risida”gi O‘zbekiston Respublikasi qonuniga o‘zgartirish va qo‘shimchalar kiritish haqidagi qonun ma’qullandi.
Rasmiy xabarga ko’ra, bugungi kunda O‘zbekistonda faoliyat yuritayotgan dasturchi-frilanserlar o‘zlari yaratgan dasturiy mahsulot va raqamli kontentni xorijiy buyurtmachilarga sotishda xalqaro onlayn platformalardan keng foydalanmoqda. Ayrim yirik platformalarda to‘lovlar bank kartalari yoki bank o‘tkazmalari orqali amalga oshirilsa-da, Upwork, Fiverr, Envato, Storyblocks kabi platformalarda to‘lovlar faqat PayPal orqali qabul qilinadi.
Hozirda PayPal to‘lov tizimi O‘zbekistonda chiqarilgan bank kartalari orqali to‘liq ishlamaydi. Bu holat “Shaxsga doir ma’lumotlar to‘g‘risida”gi qonunda shaxsiy ma’lumotlarni faqat O‘zbekiston hududida saqlash talabi belgilanganligi bilan izohlanadi. Natijada ayrim xalqaro to‘lov tizimlarining O‘zbekiston bozoriga kirishi cheklanib qolayotgani ta’kidlandi.
Qonun loyihasi bilan xalqaro onlayn to‘lov tizimlarining mamlakatda faoliyat yuritishi yengillashtiriladi. Bu fintex, elektron tijorat va raqamli iqtisodiyot rivojini jadallashtirishga, frilanserlar uchun qonuniy va shaffof to‘lov mexanizmlarini yaratishga xizmat qilishi qayd etilmoqda. Shuningdek, chet ellik sayyohlar uchun kontaktsiz to‘lov imkoniyatlari kengaytiriladi.
Yangi tartibga ko‘ra, shaxsga doir ma’lumotlarning faqat ayrim turlari — biometrik, genetik hamda telekommunikatsiya xizmatlariga oid ma’lumotlar O‘zbekiston hududida saqlanishi shart bo‘ladi. Boshqa turdagi ma’lumotlarni chet elga uzatish va saqlash uchun aniq axborot xavfsizligi talablari joriy etiladi.
Shu bilan birga, hukumatga shaxsiy ma’lumotlar himoyasi yetarli darajada ta’minlangan davlatlar ro‘yxatini tasdiqlash vakolati berilmoqda. Senatorlarning fikricha, mazkur qonun aholi va tadbirkorlik subyektlari uchun xalqaro internet platformalaridan foydalanishda yanada qulay sharoitlar yaratadi.
Eslatib o‘tilishicha, ushbu qonun loyihasi 20 yanvar kuni Qonunchilik palatasi tomonidan qabul qilingan edi. Qonun kuchga kirgach, xorijiy xizmatlar o‘zbekistonlik foydalanuvchilarning ayrim turdagi ma’lumotlarini chet elda qayta ishlash imkoniyatiga ega bo‘ladi.
