Tojikistonda Starlink sun’iy yo‘ldosh interneti ishga tushirildi
SpaceX kompaniyasiga tegishli Starlink sun’iy yo‘ldosh internet xizmati Tojikistonda ishga tushdi. Bu haqda kompaniyaning X (sobiq Twitter) ijtimoiy tarmog‘idagi rasmiy sahifasida ma’lum qilindi.
“Yuqori tezlikdagi Starlink interneti endi Tojikistonda ham mavjud”, — deyiladi xabarda. Ushbu ma’lumotni SpaceX asoschisi Ilon Mask ham o‘z sahifasida tasdiqlagan.
Avvalroq, 2025-yil 13-avgustdan boshlab Starlink sun’iy yo‘ldosh internet xizmati Qozog‘istonda rasman ishga tushirilgan edi. SpaceX va Qozog‘iston Raqamli texnologiyalar vazirligi o‘rtasida iyun oyida imzolangan kelishuv doirasida kompaniya mamlakatning axborot xavfsizligi va aloqa sohasidagi qonunchiligiga rioya qilish majburiyatini olgan.
Starlink’ning rasmiy saytida Qozog‘iston xizmat allaqachon faol bo‘lgan davlatlar qatorida ko‘rsatilgan. Shuningdek, ushbu sun’iy yo‘ldosh interneti Gruziya, Armaniston va Ozarbayjonda ham ishlamoqda.
Rasmiy ma’lumotlarga ko‘ra, O‘zbekiston, Qirg‘iziston va Turkmanistonda Starlink xizmatini 2026-yilda ishga tushirish rejalashtirilgan.
Starlink — Yer sathidan taxminan 550 kilometr balandlikda joylashgan past orbitali sun’iy yo‘ldoshlar tarmog‘i orqali ishlaydigan global internet tizimi hisoblanadi. U yuqori tezlik va past kechikish ko‘rsatkichlari bilan ajralib turadi hamda chekka hududlarda ham barqaror internetdan foydalanish imkonini beradi.
Avvalroq, O‘zbekkosmos agentligi SpaceX bilan sun’iy yo‘ldoshlarni uchirish masalasini muhokama qilayotgani ma’lum qilingandi. Shuningdek, agentlik Janubiy Koreya Aerokosmik administratsiyasi bilan kosmik texnologiyalar sohasida hamkorlik, Fransiyaning Novaspace kompaniyasi bilan esa 2035-yilgacha mo‘ljallangan milliy kosmik strategiyani ishlab chiqish bo‘yicha kelishuvga erishgan.
