Toshkentda kattalar uchun hospis yanvar oxirida ochilishi kutilmoqda
Yanvar oyi oxirida Toshkent shahrida kattalar uchun hospis faoliyat boshlashi rejalashtirilmoqda.
Muassasa og‘ir va davolab bo‘lmaydigan kasalliklarga chalingan bemorlarga palliativ va hospis yordamini ko‘rsatish bo‘yicha respublika metodik markaziga aylanishi kutilmoqda. Bu haqda 23-dekabr kuni bo‘lib o‘tgan matbuot anjumanida Toshkent shahar sog‘liqni saqlash bosh boshqarmasi boshlig‘i Botirbek Isabekov ma’lum qildi.
Uning so‘zlariga ko‘ra, hospis qurilishi yakuniy bosqichda bo‘lib, hozirda mebel bilan jihozlash va tashkiliy masalalar hal etilmoqda. Shundan so‘ng muassasa to‘liq quvvatda ish boshlaydi.
Hospis 50 o‘ringa mo‘ljallangan bo‘lib, 5,2 gektar maydonda joylashgan. Bu yerda bemorlarga kecha-yu kunduz tibbiy kuzatuv va parvarish, simptomlar va og‘riqlarni nazorat qilish, shuningdek, psixologik va ijtimoiy qo‘llab-quvvatlash xizmatlari ko‘rsatiladi. Yordam bemorlarning yaqinlarini ham qamrab oladi.
Onkolog va palliativ yordam bo‘yicha mutaxassis Yahyo Ziyayevning aytishicha, yangi hospis mamlakatda palliativ va hospis yordami tizimini shakllantirishda muhim o‘rin tutadi. Hozirda O‘zbekistonda bunday yordamga muhtoj bemorlarning faqat kichik qismi zarur parvarishdan foydalana olmoqda, ixtisoslashgan xizmatlar va tayyor mutaxassislar esa cheklangan.
“Yaqin to‘rt yil ichida O‘zbekistonda palliativ va hospis yordamini xalqaro standartlarga mos ravishda rivojlantirishni maqsad qilganmiz”, — dedi Ziyayev.
Ayni paytda palliativ yordam Respublika ixtisoslashtirilgan onkologiya va radiologiya ilmiy-amaliy tibbiyot markazining maxsus bo‘limida ko‘rsatilmoqda. Ushbu bo‘lim 1-oktabrdan faoliyat boshlagan bo‘lib, unga Yahyo Ziyayev rahbarlik qiladi. Jamoa bilan O‘zbekistondagi kam sonli mutaxassislardan biri — sertifikatlangan onkopsixolog Kamilla To‘raxo‘jayeva ham ishlamoqda.
Mutaxassislarning ta’kidlashicha, mamlakatda, ayniqsa, bemorlar va ularning oilalari bilan ishlaydigan onkopsixologlar yetishmovchiligi saqlanib qolmoqda. Bu esa palliativ yordamni kompleks tarzda rivojlantirish zaruratini yanada kuchaytirmoqda.
Eslatib o‘tamiz, hospislar va palliativ yordam bo‘limlarini tashkil etish 2017-yilda qabul qilingan onkologiya xizmatini rivojlantirish bo‘yicha prezident qarorida belgilangan edi. Poytaxtda hospis 2019-yilda ochilishi rejalashtirilgan bo‘lsa-da, moliyaviy muammolar sabab loyiha bir necha yilga kechiktirildi.
2024–2025-yillarda obyekt qisman Toshkent shahar budjeti hisobidan moliyalashtirildi. 2026-yilgi davlat budjeti muhokamasi jarayonida esa yana ikki viloyatda hospislar qurilishi uchun mablag‘ ajratilishi belgilandi.
O‘zbekistonning 2030-yilgacha bo‘lgan taraqqiyot strategiyasi doirasida mamlakatning barcha hududlarida bosqichma-bosqich hospislar va palliativ yordam bo‘limlarini tashkil etish rejalashtirilgan.
