Toshkentda Wildberries kompaniyasining WB Taxi xizmati ishga tushdi. Uni qanday qulaylik taklif qilyapti?
Foydalanuvchilarga to‘rt turdagi tariflar taklif qilinadi, shuningdek, naqd bo‘lmagan to‘lovlar uchun safar qiymatining 50% keshbek shaklida qaytariladi.
Wildberries marketing platformasi O‘zbekistonda WB Taxi xizmatini ishga tushirdi. Bu haqda Spot nashri “RVB” MChJ — Wildberries va Russ birlashgan kompaniyasi matbuot xizmatiga tayanib xabar bergan.
Ilova Android (Play Market) va iOS (App Store) platformalarida mavjud. Yangi foydalanuvchilar boshqalardan olgan shaxsiy taklif havolasi orqali yoki o‘zlari navbat ro‘yxati bilan qo‘shilishlari mumkin.
Foydalanuvchilarga tanlash uchun to‘rt tarif taklif etiladi — «Standart», «Komfort», «Komfort Plus» va «Multi». Oxirgi variant avtomobilni tezroq chaqirish imkonini beradi, chunki u bir vaqtning o‘zida bir nechta tariflarda qidiruvni amalga oshiradi.
Birinchi bosqichda WB Taxi xizmatidagi safarlar faqat Toshkent ma’muriy hududida amalga oshiriladi.
Har bir foydalanuvchi WB Taxi ilovasini o‘rnatganida xizmatning virtual valyutasida — 20 000 “qovun” sovg‘a sifatida oladi, bu summani safarlarni to‘lashda ishlatish mumkin. Naqd bo‘lmagan to‘lovlar uchun foydalanuvchilarga safar qiymatining 50% miqdorida “qovun” shaklida keshbek beriladi.
Ilovada kunu-tun ishlaydigan ovozli qo‘llab-quvvatlash xizmati mavjud. Foydalanuvchilar shuningdek, savollarini chat orqali berishi va fikr-mulohaza qoldirishi mumkin.
