Xitoyda politsiyasichilar AI ko'zoynakdan foydalanishyapti. Ular odam haqidagi barcha ma’lumotni 1-2 soniyada ko’rsatib beradi
Xitoyning Changsha shahrida yo‘l harakati politsiyasi xizmatiga sun’iy intellekt asosidagi aqlli ko‘zoynaklar joriy qilindi.
Yangi texnologiya yordamida inspektorlar avtomobilga bir qarashdayoq 1–2 soniya ichida transport vositasi haqidagi barcha muhim ma’lumotlarni olishi mumkin.
Mahalliy rasmiy manbalarga ko‘ra, AI ko‘zoynak 12 megapikselli yuqori aniqlikdagi kamera, aqlli stabilizatsiya algoritmi va 8 soat uzluksiz ishlash imkoniyatiga ega. Qurilma avtomobil raqamlarini 99 foizdan yuqori aniqlikda, hatto yorug‘lik yomon bo‘lgan sharoitlarda ham taniy oladi.
Eng muhim jihati — ko‘zoynak yo‘l harakati va ichki ishlar ma’lumotlar bazasi bilan real vaqt rejimida ulanadi. Natijada avtomobilning ro‘yxatdan o‘tganligi, texnik ko‘rik holati va avvalgi qoidabuzarliklari inspektor ko‘z o‘ngida darhol paydo bo‘ladi.
Bundan tashqari, qurilma yuzni aniqlash, 10 dan ortiq tillarda real vaqt tarjimasi va xizmat jarayonini video yozib olish funksiyalarini ham qo‘llab-quvvatlaydi.
Rasmiylarning ta’kidlashicha, ushbu texnologiya yordamida bitta avtomobilni tekshirish vaqti 30 soniyadan 1–2 soniyagacha qisqargan, yo‘l o‘tkazuvchanligi esa 80 foizga oshgan. Bu nafaqat ish samaradorligini oshiradi, balki kontaktlarsiz nazorat orqali nizolar va xavfli holatlarni kamaytirishga xizmat qiladi.
Mutaxassislar bunday AI qurilmalar kelajakda yo‘l harakati xavfsizligini ta’minlashda asosiy raqamli vositalardan biriga aylanishi mumkinligini ta’kidlashmoqda.
