Xitoyda yangi firibgarlik: odamlar sun’iy intellekt yordamida mahsulotlarni ommaviy tarzda qaytarib berishmoqda
Xitoyda ayrim mijozlar onlayn buyurtmalarni qaytarib yuborish uchun sun’iy intellektdan firibgarlik maqsadida foydalanishga harakat qilgani aniqlandi.
Xitoyda odamlar onlayn xarid qilgan mahsuloti yetib kelgandan keyin, uni buzilgan mahsulot deb pulini qaytarib olishga urinyapti. Mijozlar buni sun’iy intellekt bilan amalga oshiryapti. Ya’ni ular mahsulotni oladi va sun’iy intellektdan foydalanib, nahsulotning soxta nuqsonli fotosuratini yaratadi. Mamlakatda onlayn buyurtma qilingan mahsulotni xaridor nuqsonini isbotlasa, uni qaytarib jo’natish sharti yo‘q. Shu sababli AI yordamida tayyorlangan soxta fotosuratlar keng tarqalgan.
Czyasing shahridagi meva va sabzavot do‘koni egasi janob Chen so‘nggi uch oyda do‘konida to‘qqizta mahsulot qaytarilganini bildirgan. Dastlab u xaridorlarga ishonib pulni qaytarib bergan, ammo qaytarishlar ko‘paygani sababli shubhalana boshlagan. Fotosuratlarda raqamli tahrir belgilari aniqlangan, ammo platforma bu yetarli dalil emasligini bildirgan.
Ba’zi do‘konlar SI yordamida yaratilgan rasmlarni aniqlash vositalarini joriy qilgan. Sentabr oyida Xitoy hukumati SI bilan yaratilgan kontentga suv belgisi va ma’lumot teglarini qo‘yishni majburiy qilgan. Biroq amaliyotda bu belgilarni tekshirish qiyin, shuning uchun firibgarlik xavfi davom etmoqda.
