Xorijdan havo tozalagich buyurtma qilinganda bojxona to‘lovi to'lanadimi?
Ayrim hollarda havo tozalagich olib kirganda boj to'lashga to'g'ri keladi.
O‘zbekistonga havo tozalagich olib kirishda bojxona boji dekabr oyining boshida bekor qilingan. Biroq ayrim holatlarda bojxonada baribir qo‘shimcha to‘lov talab qilinishi mumkin.
Havo tozalash uskunalari bojxona bojidan ozod qilingan, biroq bu imtiyoz belgilangan bojsiz olib kirish limitlari doirasida amal qiladi, deb ma'lum qilgan Bojxona qo‘mitasi Kun.uz'ga.
Agar ushbu limitdan oshilsa, ortiqcha qism uchun yagona bojxona to‘lovi undiriladi. Bu to‘lov bojxona qiymatining 30 foizini tashkil etadi (lekin har bir kilogramm uchun kamida 3 AQSh dollari).
Amaldagi bojsiz olib kirish normalari quyidagicha:
- havo transporti orqali — 1000 dollar;
- temiryo‘l va daryo transporti orqali — 500 dollar;
- avtomobil yoki piyoda o‘tkazish punktlari orqali — 300 dollar;
- xalqaro kurerlik jo‘natmalari orqali — 200 dollar (1 oyda);
- xalqaro pochta jo‘natmalari orqali — 100 dollar (1 oyda).
Masalan, agar fuqaro xalqaro kurerlik xizmati orqali 200 dollargacha bo‘lgan havo tozalagich buyurtma qilsa, hech qanday qo‘shimcha to‘lov to‘lanmaydi. Ammo qurilma qiymati 320 dollar bo‘lsa, limitdan oshgan 120 dollar uchun 36 dollar yagona bojxona to‘lovi undiriladi.
Shu sababli xorijdan havo tozalagich buyurtma qilishda yetkazib berish turi va belgilangan bojxona limitlariga alohida e’tibor berish lozim.
