1 aprel’dan eskrou tizimida komissiyalar belgilandi
Yangi tartibga ko‘ra, komissiya miqdori bitim turiga qarab cheklangan.
1 aprel’dan boshlab eskrou tizimi orqali amalga oshiriladigan bitimlar bo‘yicha bank xizmatlari uchun komissiya miqdorlari aniqlandi. Bu haqida O‘zbekiston Respublikasi Markaziy banki ma’lum qildi.
Yangi tartibga ko‘ra, komissiya miqdori bitim turiga qarab cheklangan.
Qancha to‘lanadi?
- Ko‘chmas mulk bitimlari uchun — komissiya bazaviy hisoblash miqdorining 50 foizidan oshmaydi (206 ming so‘mgacha)
- Avtotransport vositalari uchun — komissiya BHMning 25 foizidan oshmaydi (103 ming so‘mgacha)
Komissiya qanday olinadi?
Muhim jihatlardan biri — komissiyaning qanday taqsimlanishidir:
- Agar xaridor va sotuvchi bitta bank xizmatidan foydalansa, komissiya faqat bir marta undiriladi
- Agar ular turli banklarda xizmat ko‘rsatsa, har bir bank komissiyaning yarmidan oshmagan qismini oladi
Agar bitim bekor qilinsa-chi?
Belgilangan tartibga ko‘ra, agar bitim amalga oshmasa yoki bekor qilinsa, eskrou hisobvarag‘ida saqlanayotgan mablag‘ to‘liq xaridorga qaytariladi.
Barcha banklarda bir xilmi?
Yo‘q. Ushbu maksimal komissiyalar faqat davlat banklari uchun amal qiladi. Xususiy va boshqa tijorat banklarida esa komissiya miqdori ularning ichki tarif siyosati asosida belgilanadi.
Yangi tartib eskrou orqali bitimlarni yana-da shaffof qilish va ortiqcha xarajatlarni cheklashga qaratilgan.