“40 mln so‘mga 200 kv.metrlik xonadon” — Soliq qo‘mitasi uy-joylar uchun minimal narxlarni belgiladi
Uy-joylar bo‘yicha minimal narxlar amaliyoti joriy etilmoqda
Poytaxt Toshkentning Mirzo Ulug‘bek tumanida ayrim uy-joylar kvadrat metri 14 ming so‘mdan sotilgan holatlar aniqlangan. Shu sababli Soliq qo‘mitasi uy-joylarni sotish narxini past ko‘rsatish holatlarini bartaraf etish maqsadida, ko‘chmas mulk obyektlari soliq bazasini bozor qiymati asosida aniqlash amaliyotini joriy qilmoqda. Bu haqda 17-dekabr kuni qo‘mita raisi o‘rinbosari Jahongir Abdiyev tadbirkorlar bilan ochiq muloqotda ma’lum qildi.
O‘zbekiston Quruvchilar uyushmasi raisi Mansur Niyozmuhamedovning ma’lumot berishicha, prezidentning yaqinda qabul qilingan PF-246 farmoni bilan 2026-yil 1-yanvardan boshlab, ko‘chmas mulk obyektlari va qurilish materiallari soliq bazasi bozor qiymatiga asosan aniqlanadi.
Niyozmuhamedov shuni ta’kidladi: Toshkent shahri beshta hududga, uy-joylar esa ekonom, komfort va premium segmentlarga bo‘linadi. Shu sababli, yangi tartib uy-joylarning joylashuvi va segmentiga qarab minimal narxlarni belgilash mexanizmini nazarda tutadi.
Savdo-sanoat palatasi raisi Davron Vahobovning fikriga ko‘ra, uy-joylar minimal narxlari ularning tannarxidan kelib chiqqan holda, yer qiymati hisobga olinmasdan belgilanishi mumkin. Misol uchun:
- Beton uylar — kvadrat metri 4,6 mln so‘m
- G‘ishtli uylar — kvadrat metri 5,6 mln so‘m
“Solisq bazasi bundan past bo‘lmaydi”, — deya aniqlik kiritdi Vahobov.
O‘rtacha narx va bozor misoli
Jahongir Abdiyevning tushuntirishicha, yangi tartib kvadrat metri $800 yoki $2000 ga sotiladigan uy-joylarga bevosita ta’sir qilmaydi. U misol keltirdi: Mirzo Ulug‘bek tumanida 200 kvadrat metrli kvartira 40 mln so‘mga sotilgan, bu esa kvadrat metri 14 ming so‘mga to‘g‘ri keladi. Shu tarzda, bozor narxlari va o‘rtacha narxlar asosida soliq bazasi aniqlanadi.
“Biz o‘rtacha narxni belgilaymiz, undan yuqori narxlar soliq organlariga hech qanday e’tiroz tug‘dirmaydi”, — dedi Abdiyev.
Quruvchilar uyushmasi raisi, uy-joylarni segmentlash tizimiga o‘tkazish va har bir klassifikatsiya doirasida uy-joy mos kelishi kerak bo‘lgan talablarni tasdiqlashni taklif qildi. Tegishli takliflar allaqachon Qurilish vazirligiga yuborilgan.
Qurilish va uy-joy kommunal xo‘jaligi vaziri Sherzod Hidoyatovning aytishicha, yangi eksrou tizimi ishga tushirilgach, loyiha to‘liq ekspertizadan o‘tkaziladi. Soliq bazasi esa marja va tannarx o‘rtasidagi farq sifatida aniqlanadi.
