5 grammli oltin quymalari narxi 10 mln so‘mdan pastladi
Jahon bozorida ham oltin narxi bir troya unsiyasi uchun 4600 dollardan pastga tushdi.
O‘zbekistonda o‘lchovli oltin quymalari narxi sezilarli darajada pasaydi. Markaziy bank ma’lumotiga ko‘ra, 5 grammli oltin quymasining narxi 9,86 mln so‘mni tashkil etib, o‘tgan haftaga nisbatan 918 ming so‘mga yoki 8,5 foizga arzonlashgan.
Shuningdek, 10 grammli oltin quymasi 19,73 mln so‘mga, 20 grammli quymasi esa 39,46 mln so‘mga baholangan. 50 gramm oltin narxi 98,67 mln so‘mni, 100 grammli quymaning qiymati esa 197,34 mln so‘mni tashkil etmoqda.
Qayta sotib olish narxlari ham pasaygan. Xususan, 5 grammli oltin quymasining shikastlanmagan qadoqdagi qabul narxi 9,67 mln so‘m, qadoq shikastlangan yoki ekspertizadan o‘tkazilgan holatda esa 9,57 mln so‘m etib belgilangan. 100 grammli quymaning qabul narxi mos ravishda 193,43 mln va 191,48 mln so‘mni tashkil qiladi.
Goldprice ma’lumotlariga ko‘ra, jahon bozorida ham oltin narxi pasaygan. Xususan, oltinning bir troya unsiyasi 4 562,32 dollargacha tushib, bir sutkada 6,7 foizga kamaygan.
