AQSh 2026-yilgi Jahon chempionati muxlislari uchun FIFA PASS vizasini olish tartibini e’lon qilindi
2026-yilgi futbol bo‘yicha Jahon chempionatiga tashrif buyurishni rejalashtirayotgan O‘zbekiston fuqarolari uchun viza jarayonida yangi tartib joriy etildi.
Yangi tartibga ko‘ra, viza suhbatiga yozilish uchun asosiy shartlardan biri — FIFAning rasmiy platformasi orqali sotib olingan o‘yin chiptasining mavjudligini tasdiqlashdir.
Nomzodlar FIFA rasmiy saytida shaxsiy profil yaratib, FIFA PASS rozilik formasini to‘ldirishi va barcha ma’lumotlarni xorijiy pasportdagi ma’lumotlarga to‘liq mos ravishda kiritishi lozim bo‘ladi.
Viza arizasi jarayoni AQSh Davlat departamentining DS-160 elektron anketasini to‘ldirish orqali boshlanadi. Ushbu bosqichda kiritilgan ma’lumotlar FIFA tizimidagi ma’lumotlar bilan to‘liq mos bo‘lishi talab etiladi.
Shundan so‘ng ariza beruvchilar konsullik suhbatiga yoziladi, rasm yuklaydi hamda viza yig‘imini to‘laydi. Jarayon davomida chiptaga ega ekanligi haqidagi ma’lumotni tasdiqlash talab etiladi. Ma’lumotlar to‘liq mos kelgan taqdirda, FIFA PASS tizimi suhbatga yozilish jarayonini soddalashtirishi mumkin.
Biroq elchixona ta’kidlashicha, stadion chiptasining mavjudligi viza berilishini kafolatlamaydi. Barcha murojaatchilar standart xavfsizlik tekshiruvlaridan o‘tadi va konsul bilan suhbatda aniq hamda to‘g‘ri ma’lumot berishlari shart.
Eslatib o‘tamiz, 2026-yil 10-apreldan boshlab AQSh Green Card (DV-2027) lotereyasida ham yangi talablar joriy etiladi. Unga ko‘ra, ishtirokchilar pasport ma’lumotlarini yuklashlari hamda biografik ma’lumotlarni yanada aniq va to‘liq taqdim etishlari talab etiladi.