AQShda sun’iy intellekt qancha ish o‘rnini qisqartirgani hisoblab chiqildi
AQShda sun’iy intellekt (SI) texnologiyasining keng qo‘llanilishi ish bozorida sezilarli o‘zgarishlarga sabab bo‘lyapti.
Challenger, Gray & Christmas tahlil firmasi ma’lumotlariga ko‘ra, 2025 yil yakuniga kelib, SI natijasida 55 ming amerikalik ish o‘rnini yo‘qotgan.
Oktyabr oyida amerikalik ish beruvchilar 153 ming, noyabrda esa 71 ming ish o‘rnini qisqartirishni e’lon qilgan. Analitiklarning hisob-kitoblariga ko‘ra, sun’iy intellekt oyiga o‘rtacha 7 ming ish o‘rnini “egallamoqda”.
SI ish beruvchilar uchun ayni vaqtda xarajatlarni kamaytirishning samarali vositasi sifatida qadrlanmoqda. O‘sib borayotgan inflyatsiya va tartibga oid xarajatlar fonida, sun’iy intellektning tezkor yechim sifatidagi jozibasi oshmoqda.
Massachusets texnologiya instituti (MIT) tadqiqotlariga ko‘ra, SI AQSh mehnat bozorining 11,7 foiz ish o‘rnini qamrab olishi mumkin va ish beruvchilar uchun 1,2 trillion dollarga yaqin tejash imkoniyatini beradi. Shu bilan birga, ba’zi ekspertlar, jumladan Oksford internet instituti tadqiqotchisi Fabian Stefan, SI faqat ishdan bo‘shatishlarni tushuntirish uchun qulay vosita bo‘lib xizmat qilayotganini ta’kidlamoqda. Uning fikricha, avvalgi yillarda ko‘plab kompaniyalar ortiqcha xodim yollagan va hozir bunga qarshi choralar ko‘rilmoqda.
Challenger, Gray & Christmas kompaniyasining hisob-kitoblariga ko‘ra, 2025 yilda AQShdagi jami ish o‘rinlarini qisqartirish 1,17 milliondan oshdi. Bu raqam 2020 yil COVID davridan beri rekord ko‘rsatkich sifatida qayd etilgan (2020 yilda 2,2 million ish o‘rni qisqartirilgan edi).
