Dekabrda o‘zbekistonliklar eng ko‘p nimaga pul ko‘proq to‘lagan?
O‘zbekistonliklar dekabrda eng ko‘p meva-sabzavotlar, yoqilg‘i va tashish xizmatlari qimmatlashganini sezdi.
2025-yil dekabr oyida O‘zbekistonda aholi tomonidan sezilgan inflyatsiya darajasi noyabrga nisbatan 0,2 foiz bandga oshib, 12 foizni tashkil etdi. Bu haqda Markaziy bank tomonidan har oy o‘tkaziladigan so‘rovnoma natijalarida ma’lum qilindi.
Shu bilan birga, yil boshidan buyon aholi orasida sezilgan inflyatsiya ko‘rsatkichi 2 foiz banddan ko‘proqqa pasaygan. Bu inflyatsion bosim yil davomida nisbatan yumshaganidan dalolat beradi.
Hududlar kesimida sezilgan inflyatsiya
Dekabr oyida sezilgan inflyatsiyaning eng yuqori darajasi Toshkent shahrida qayd etildi — 14,3 foiz. Keyingi o‘rinlarda Qashqadaryo viloyati (14,1 foiz) va Toshkent viloyati (13,8 foiz) joy oldi.
Eng past ko‘rsatkichlar esa Xorazm viloyatida (10,4 foiz), Samarqand (10,6 foiz) va Jizzax viloyatlarida (10,9 foiz) kuzatildi.
Ijtimoiy guruhlar bo‘yicha farqlar
Aholi guruhlari kesimida eng yuqori sezilgan inflyatsiya ilm-fan va ta’lim sohasi vakillari tomonidan qayd etildi — 13,2 foiz. Shuningdek, pensionerlar (13,1 foiz) va ishlab chiqarish sohasi xodimlari (13 foiz) ham yuqori ko‘rsatkichlarni bildirgan.
Bunga qarama-qarshi ravishda, maishiy xizmat ko‘rsatish sohasi vakillari (10,3 foiz), talabalar (10,7 foiz) va kafe-restoran xizmatlari sohasida ishlovchilar (11 foiz) inflyatsiyani nisbatan pastroq darajada sezgan.
Qaysi mahsulot va xizmatlar eng ko‘p qimmatlashdi?
Dekabr oyida respondentlarning eng katta qismi benzin va yoqilg‘i, meva-sabzavotlar hamda yo‘lkira va tashish xizmatlari narxlari sezilarli darajada oshganini qayd etdi. Bundan tashqari, kafe va restoran xizmatlari, tuxum, shakar va qandolat mahsulotlari qimmatlashganini bildirganlar ulushi ham oshdi.
Go‘sht va sut mahsulotlari narxlari oshganini qayd etgan respondentlar soni o‘tgan oyga nisbatan kamaygan bo‘lsa-da, ushbu mahsulotlar bo‘yicha yuqori sezuvchanlik saqlanib qolmoqda. Ayni paytda dori-darmonlar narxi oshganini sezganlar ulushi kamaygani kuzatildi.
