O‘zbekiston noyabrda oltin xaridini 10 tonnagacha oshirdi va dunyodagi eng yirik xaridorlar uchligida qoldi
O‘zbekiston noyabr oyida 10 tonna oltin xarid qilib, dunyodagi eng yirik oltin xaridorlari reytingida uchinchi o‘rinni egalladi. Bu haqda Jahon oltin kengashi (World Gold Council — WGC) ma’lumot berdi.
WGC hisobotiga ko‘ra, noyabrda markaziy banklarning oltin xaridlari 45 tonnani tashkil etdi. Bu ko‘rsatkich oktabrdagiga nisbatan biroz past bo‘lsa-da, yil boshidagi darajadan yuqori saqlanib qolmoqda. Markaziy banklar avgust oyidan buyon oltinni faol sotib ola boshlagan, oltin sotuvi esa apreldan boshlab kamaygan.
Eng yirik oltin xaridorlari
Noyabr oyida oltin xaridi bo‘yicha:
- Polsha — 12 tonna
- Braziliya — 11 tonna
- O‘zbekiston — 10 tonna
Keyingi o‘rinlarda Qozog‘iston (8 tonna), Qirg‘iziston va Chexiya (2 tonnadan), Xitoy hamda Indoneziya (1 tonnadan) joy oldi. Iordaniya va Qatar esa oltinning sof sotuvchilari sifatida qayd etildi.
Yil boshidan buyon holat
2025-yil boshidan buyon Polsha dunyodagi eng yirik oltin xaridori bo‘lib qolmoqda. Undan keyingi o‘rinlarda Qozog‘iston, Braziliya, Turkiya va Xitoy qayd etilgan.
Shu bilan birga, O‘zbekiston yil boshidan buyon Singapur va Rossiyadan keyin dunyodagi eng yirik oltin sotuvchilar uchligida qolmoqda.
Oltin eksporti va zaxiralar
Noyabr oyida O‘zbekiston oltin eksportini to‘liq to‘xtatdi. Bu Markaziy bank tomonidan qimmatbaho metall sotilmagan ketma-ket to‘rtinchi oy bo‘ldi. 2025-yilning 11 oyida oltin eksporti o‘tgan yilga nisbatan 49,4 foizga oshib, 9,9 mlrd dollardan ortdi.
1-yanvar holatiga:
- oltin-valyuta zaxiralari — 66,3 mlrd dollar (tarixiy rekord),
- oltin zaxirasi qiymati — 50,85 mlrd dollar,
- oltinning fizik hajmi — 12,2 mln unsiya.
Dekabr oyining o‘zida zaxiralar 5,08 mlrd dollarga, yil boshidan esa 25,1 mlrd dollarga (+61%) oshgan.
