O‘zbekistonda 5 grammli oltin quymasi narxi 10 million so‘mdan oshdi
Jahon birjalarida qimmatbaho metall kotirovkalari bir troya unsiyasi uchun $5 mingdan yuqori sotilmoqda.
26-yanvar kuni O‘zbekistonda o‘lchovli oltin quymalar narxi yana tarixiy maksimumni yangiladi. Bu Markaziy bankning amaldagi ma’lumotlaridaaks etgan.
Qimmatbaho metallning 1 gramm narxi taxminan 2,007 mln so‘mni tashkil etdi. 2026-yil boshidan buyon kotirovkalar maksimal qiymatini 11-marta yangiladi.
5 grammli quymaning narxi endi 10,036 mln so‘m, 50 va 100 grammli aktivlar esa mos ravishda 100,36 mln va 200,72 mln so‘mdan sotilmoqda. Narxlar dinamikasi oldingi davrlarga nisbatan sezilarli qimmatlashuvni ko‘rsatmoqda.
Regulyator qimmatbaho metallni orqaga sotib olish narxlarini ham qayta ko‘rib chiqdi. Shikastlanmagan qadoqda bo‘lgan 100 grammli quymani topshirgan fuqarolar 191,07 mln so‘m olishi mumkin. Himoya qobig‘i shikastlangan yoki texnik standartlarga mos kelmagan holatda to‘lov miqdori 189,14 mln so‘mni tashkil etadi.
Goldprice ma’lumotlariga ko‘ra, jahon bozorida ham o‘sish tendensiyasi kuzatilmoqda. Oltinning bir troya unsiyasi narxi $5 066 (1 gramm uchun $162,9) darajasiga yetdi va bir sutkada 1,55% o‘sishni ko‘rsatdi. Kumush ham mustahkamlanib, bir unsiya uchun $107,6 atrofida savdolanmoqda.
2025-yil yakunlariga ko‘ra, O‘zbekiston oltin eksportini rekord darajadagi $9,9 mlrdga yetkazdi, bu ko‘rsatkich o‘tgan yilga nisbatan 32,3%ga oshgan. Qimmatbaho metall umumiy eksport hajmining 29,2%ini tashkil etdi va bu butun kuzatuvlar tarixidagi eng yuqori ko‘rsatkich bo‘ldi.
