O‘zbekistonda 5 grammlik oltin quyma narxi ilk bor 11 mln so‘mga yaqinlashdi
29-yanvar, dushanba kuni O‘zbekistonda 5 grammlik oltin quyma narxi ilk bor 11 mln so‘mga yaqinlashdi. Bu haqda Markaziy bank e’lon qilgan ma’lumotlarda keltirilgan.
Ma’lum qilinishicha, bir gramm oltin narxi bir kun ichida 5,5 foizdan ko‘proqqa oshib, 2 mln 172 ming 780 so‘mni tashkil etgan. Natijada 5 grammlik oltin quyma 10 mln 864 ming so‘mga baholangan bo‘lib, bu avvalgi ko‘rsatkichdan 573 ming so‘mga yuqori.
Eslatib o‘tamiz, 26-yanvar kuni 5 grammlik oltin quyma narxi ilk bor 10 mln so‘mlik psixologik chegaradan oshgandi. Yil boshidan buyon oltin narxi 25,5 foizga, so‘nggi 12 oy ichida esa qariyb 84 foizga oshgan.
Markaziy bank ma’lumotlariga ko‘ra, 29-yanvar holatiga oltin quymalarining sotuv va qayta sotib olish narxlari quyidagicha shakllangan:
- 5 gramm — sotuv narxi: 10 864 000 so‘m qayta sotib olish: 10 243 000 so‘m (qadog‘i but), 10 140 000 so‘m (qadog‘i buzilgan)
- 10 gramm — sotuv narxi: 21 728 000 so‘m
- 20 gramm — sotuv narxi: 43 456 000 so‘m
- 50 gramm — sotuv narxi: 108 639 000 so‘m
- 100 gramm — sotuv narxi: 217 278 000 so‘m
Jahon bozorida ham oltin narxi yangi rekordni qayd etdi. Xususan, oltinning bir troya unsiyasi $5559 ga, bir grammi esa $178,73 ga yetdi. Bir kun ichida narxlar 9,3 foizga, yillik hisobda esa 80 foizdan ko‘proqqa oshgan.
Shuningdek, kumush narxi ham keskin ko‘tarildi — bir troya unsiyasi $118,3 ga yetib, bir kunda 11,4 foizga qimmatlashdi.
Ma’lumot o‘rnida, Markaziy bank 2026-yildan boshlab o‘lchovli oltin quymalarining nafaqat sotuv, balki qayta sotib olish narxlarini ham e’lon qilishni boshladi. Narxlar quyma qadog‘ining holatiga qarab belgilanadi.
Avvalroq O‘zbekistonning oltin-valyuta zaxiralari ketma-ket besh oy davomida yangilanib borayotgani xabar qilingandi. 2026-yil 1-yanvar holatiga ko‘ra, mamlakatning rasmiy zaxira aktivlari $66,31 mlrdga yetgan.
