O‘zbekistonda Haj mavsumi 2-maydan boshlanadi
O‘zbekistonda 2026-yilgi Haj mavsumi 2-maydan boshlanadi. Bu haqda O‘zbekiston musulmonlari idorasi ma’lum qildi.
Qayd etilishicha, ziyoratchilarni Saudiya Arabistoniga jo‘natish jarayoni 2-maydan 18-mayga qadar davom etadi. Haj safariga yo‘l oluvchilar respublikaning 9 ta hududiy aeroportidan — Toshkent, Namangan, Farg‘ona, Andijon, Samarqand, Buxoro, Qarshi, Termiz va Urganch shaharlaridan to‘g‘ridan-to‘g‘ri Madinaga parvoz qiladi.
Ziyoratchilarni Madinaga yetkazish FlyAdeal aviakompaniyasi tomonidan, ularni vatanga qaytarish esa Uzbekistan Airways tomonidan amalga oshiriladi.
Hozirda Haj mavsumiga tayyorgarlik ishlari yakuniy bosqichda. Xususan:
- ziyoratchilar tibbiy ko‘rikdan o‘tkazilib, meningitga qarshi emlangan;
- haj vizalari va zarur hujjatlar rasmiylashtirilgan;
- guruh rahbarlari biriktirilib, safar oldi mashg‘ulotlari o‘tkazilmoqda.
Shuningdek, har bir ziyoratchiga safar davomida foydalanish uchun maxsus anjomlar to‘plami berilgan. Unda qo‘llanma, sumka, nimcha, termos, soyabon, SIM-karta va quvvatlagich mavjud.
Ayni paytda Saudiya Arabistonida faoliyat yuritayotgan ishchi guruh Mino vodiysi va Arofot vodiysi hududlarida, shuningdek mehmonxonalarda o‘zbekistonlik ziyoratchilar uchun zarur sharoitlarni tayyorlash ishlarini olib bormoqda.