Toshkent markazida uy-joyning bir kvadrat metri $1853ga yetdi
INFOLine tahlilchilari Markaziy Osiyo, Kavkaz va MDH mamlakatlarida ko‘chmas mulk bozorlarining holatini qiyosiy o‘rganib chiqdi. Tadqiqot natijalari agentlikning choraklik sharhida keltirilgan.
Hisobotga ko‘ra, Toshkent uy-joy narxlari bo‘yicha o‘rtacha ko‘rsatkichlarga ega shaharlar qatoridanjoy olgan. Poytaxt markazida bir kvadrat metr turar joyning narxi $1853, markazdan uzoq hududlarda esa $986ni tashkil etgan. Bir yil davomida uy-joy narxlari 9,6% ga pasaygani qayd etilgan.
Qiyosiy reytingda Toshkent Boku ($2215) va Minsk ($2191)dan arzonroq, biroq Olmaota ($1822) bilan deyarli bir xil darajada baholangan.
Ko‘rib chiqilgan poytaxtlar orasida eng arzon uy-joy Ostona shahrida qayd etilgan. Bu yerda markaziy hududlarda bir kvadrat metr narxi $1145ni tashkil etgan bo‘lib, yil davomida 1,4% ga oshgan. Shahar chekkalarida esa narx $845 bo‘lib, 12,4% ga o‘sish kuzatilgan.
Rossiyadan tashqari mamlakatlar orasida uy-joy narxlari bo‘yicha Armaniya yetakchi bo‘lgan. Bitimlarning asosiy qismi Yerevanda amalga oshirilgan. Shaharning markazida bir kvadrat metr narxi $3232ni tashkil etib, yil davomida 3% ga pasaygan, chekka hududlarda esa $1573ga yetgan va 1,5% ga oshgan.
Umumiy reytingda ikkinchi o‘rinni Rossiya egallagan. Moskvada bir kvadrat metr uy-joy narxi $11 118, Sankt-Peterburgda esa $4252ni tashkil etadi. Tahlilchilar dollardagi narxlar o‘sishini rubl kursining mustahkamlanishi bilan izohlamoqda.
Shu bilan birga, mutaxassislar Rossiyada birlamchi bozordagi narxlarning oshishi nominal xarakterga ega ekanini ta’kidlashmoqda. Ularning fikricha, bu ko‘rsatkichlar ko‘chmas mulkning real bozor qiymatini emas, balki ipoteka va boshqa moliyaviy instrumentlar bilan bog‘liq xarajatlarning narxga qo‘shilishini aks ettiradi. Quruvchilar taklif qilayotgan narxlar bilan ikkilamchi bozor o‘rtasidagi tafovut **15–20%**ni tashkil etmoqda.
