«Uyda yolg‘iz» filmidagi Kevin xarid qilgan mahsulotlar 35 yil ichida qanchaga qimmatladi?
Mashhur «Uyda yolg‘iz» (Home Alone) filmidagi Kevin Makkalister 19,83 dollarga xarid qilgan mahsulotlar bugungi kunda 53,95 dollarga yetdi.
Mashhur «Uyda yolg‘iz» (Home Alone) filmidagi Kevin Makkalister xarid qilgan mahsulotlar savati AQShdagi inflyatsiyani ko’rsatib berdi. USA Today hisob-kitoblariga ko‘ra, 1990 yilda atigi 19,83 dollar bo‘lgan Kevin xarid qilgan mahsulotlar savati hozirda 53,95 dollarga tushmoqda. Bu esa 35 yil ichida 167% o‘sish degani.
Kevin nimalarni xarid qilgandi?
Film qahramoni bo‘lgan sakkiz yoshli Kevin do‘kondan quyidagi mahsulotlarni xarid qilgan:
- sut
- apelsin sharbati
- oq non
- muzlatilgan tayyor ovqat
- kir yuvish kukuni
- qog‘oz mahsulotlari
- o‘yinchoq askarchalar
1990 yilda bu mahsulotlar jamlanmasi oddiy va hamyonbop bo‘lgan bo‘lsa, bugungi kunda u AQShdagi kundalik xarajatlarning qanchalik oshganini ko‘rsatib turibdi.
AQShda oziq-ovqat narxlari nega oshdi?
The New York Post’ning yozishicha, mahsulotlar narxining keskin oshishi AQShdagi umumiy inflyatsion jarayonlar bilan bog‘liq. 2019–2024 yillar oralig‘ida iste’mol mahsulotlari narxi o‘rtacha 27,5% ga oshgan. Eng katta o’sish esa 2021–2023 yillarga to‘g‘ri keladi.
Bunga asosiy sabablar:
- ta’minot zanjirlaridagi uzilishlar
- energiya narxlarining oshishi
- ishchi kuchi tanqisligi
- global iqtisodiy beqarorlik
Eng ko‘p qimmatlashgan mahsulot — tuxum
Inflatsiya ayrim mahsulotlarga ko’proq ta’sir qilgan. Reuters ma’lumotlariga ko‘ra, tuxum narxi rekord darajada oshgan:
- 2019 yilda: 1,4 dollar
- 2024 yilda: 3,17 dollar
- 2025 yil boshida: 5,29 dollargacha
Bu o‘sishning asosiy sababi — qush grippi epidemiyasi. Yanvar oyida tuxum narxi o‘tgan yilga nisbatan 50% ga qimmatlashgan.
AQSh Mehnat statistikasi byurosi ma’lumotlariga ko‘ra, noyabr oyida iste’mol narxlari yillik hisobda 2,7% ga oshgan. Bu ko‘rsatkich Reuters so‘rovida qatnashgan iqtisodchilar kutgan 3,1% dan past bo‘lib chiqdi. Mutaxassislar buni inflyatsiya bosimi asta-sekin susayib borayotganining belgisi sifatida baholamoqda.
«Uyda yolg‘iz» filmidagi oddiy epizod bugungi kunda AQSh iqtisodiyotidagi real muammolarni ko’rsatib berdi. Kevin Makkalister xarid qilgan mahsulotlar savati — bu shunchaki kinoning bir qismi emas, balki oddiy amerikaliklar duch kelayotgan inflyatsiya bosimining ramziga aylandi.
