Yaponiya dunyodagi eng yirik AESni qayta ishga tushirilganidan bir necha soat o‘tib to‘xtatdi
Yaponiya dunyodagi eng yirik atom elektr stansiyasi — «Kashivazaki-Kariva» AES faoliyatini qayta ishga tushirilganidan bir necha soat o‘tib yana to‘xtatdi. Bu haqda stansiya operatori — Tokyo Electric Power Company (TEPCO) ma’lum qildi.
Qayd etilishicha, texnik nosozlik 6-reaktorni ishga tushirish jarayonida yuzaga kelgan. Ogohlantiruvchi signal ishga tushgan bo‘lsa-da, reaktor barqaror holatda qolgan va atrof-muhitga radioaktivta’sir kuzatilmagan.
Mazkur reaktor belgilangan muddatdan bir kun kechikib ishga tushirilgan bo‘lib, u 2011-yilda yuz bergan Fukusima AESdagi avariyadan so‘ng stansiyada qayta ishga tushirilgan ilk reaktor hisoblanadi.
TEPCO vakili Takashi Kobayashining aytishicha, kompaniya hozirda hodisaning sabablarini o‘rganmoqda, reaktor qachon yana ishga tushirilishi hozircha noma’lum.
2011-yilda 9,0 magnitudali zilzila va undan keyingi sunami Fukusima AESda yirik avariyaga sabab bo‘lib, 150 mingdan ortiq aholi evakuatsiya qilingan edi. Ushbu fojia ortidan Yaponiya mamlakatdagi barcha 54 ta yadroviy reaktorni yopgan.
Keyinchalik, 2015-yildan boshlab, mamlakat energetika xavfsizligi va 2050-yilga borib nol uglerod chiqindilariga erishish maqsadida AESlarni bosqichma-bosqich qayta ishga tushira boshladi. Hozirga qadar 33 ta reaktordan 15 tasi qayta ishga tushirilgan.
Ma’lum qilinishicha, Kashivazaki-Kariva AESning 7-reaktori 2030-yilgacha ishga tushirilmaydi, qolgan besh reaktor esa butunlay yopilishi mumkin. Shu sababli stansiya quvvati avvalgi darajaga yetmaydi.
6-reaktorning qayta ishga tushirilishi mahalliy aholi noroziligiga sabab bo‘lgan. O‘tgan haftalarda TEPCO bosh qarorgohi va Niigata prefekturasi ma’muriyati oldida norozilik namoyishlari o‘tkazilgan.
